Qasigiannguit utoqqaat illutaalerunarput

Qasigiaanguani utoqqaat illussaat sananeqarsinnaanngulerunarpoq. Aningaasanut inatsisissap inatsisartuni pingasunngornermi ataatsimiinnermi aappassaaneerneqarnerani, aningaasat 10,5 million koruunit, Qasigiannguani inissianik aserfallatsaaliinernut atorneqartussaagaluartut, utoqqaat illuanik sanaartornissamut aningaasat nuutsinneqarsinnaanerat Naalakkersuisut siunnersuutigaat.

Qasigiannguani utoqqaat illuanik sanasoqarnissaa kommunimit qangali kissaatigineqartarsimagaluarpoq, namminersornerullutilli oqartussani isumaqatigiissutaasoq, tassalu kommuni namminersornerullutillu oqartussat assigiimmik akileeqatigiillutik 50-50-imik taallugu akileeqatigiittarneq, aningaasarliorneq pissutigalugu kommunip ajornartittarsimavaa.

Qasigiannguanili inissianik aserfallatsaaliinernut aningaasat atorneqartussaagaluit, taarsiullugu utoqqaat illuliornissamut nuutitsiniarlutik, Naalakkersuisut siunnersuuteqarnerat, Qasigiannguani borgmesterimut isumallualersitsipput.

- Taamatut tusarluni nuannaajallannanngitsuunngilaq. Taamannami kissaatigiuarsimavarput.

Qasigiannguani borgmesteri, Jess svane taama oqarpoq. Naalakkersuisut aningaasanik taamatut illikartitsiinnarnissaat, Atassummit ernumanartortaqartinneqarpoq. Ellen Christoffersenilu Atassummeersoq ima oqarpoq:

- Taamatut nuutsitsinissaq immini ajornartorsiutitut isiginngikkaluarparput, uaniliuna taamatut iliorneq kommuninut allanut tuniluunnissaa ernumagigipput. Kommunit ingiinnarlutik qitiusuminngaanniit ajornartorsiulernermi ikiorneqarsinnaaneq pinngitsoortikkusukkipput. Qasigiannguit kommunia taamatut pineqarsinnaappat, kommunit allat aamma taamatut pineqarsinnaanissamik eqqarsalersinnaapput. Qaanaap kommunia assigalugu, Qasigiannguit taarsigassarsitinneqarsinnaavoq.

Taama oqarpoq, Atassut sinnerlugu inatsisartuni ilaasortaq, Ellen Kristoffersen.

Aningaasaqarnermut Naalakkersuisoq Josef Motzfeldt oqarpoq, Qasigiannguit taamatut pineqarnissaat immikkorluinnaq isigineqartariaqartoq.