Qasigiannguit Efterskoliannut tunngatillugu nalunaarusiaq Demokraatinit apeqquserneqarpoq

Demokraatit isumaqarput pisimasoq kinguneqartariaqartoq, inatsisartunulli qinersisoqalernera tamatuminnga ajornakusoortitsisoq. Jens B. Frederiksen ima oqarpoq:

- Inatsisartunut qinersisoqartussaammat kinguneqartinneqarnissaa ajornakusoorpoq, kisianni suliamut tunngatillugu suli misissugassaqarpoq. Suliaq Kukkunersiuinermut ataatsimiititaliami suliarineqartussaammat tamanna pillugu ataatsimiinnissaq Naalakkersuisut siulittaasuannit Hans Enoksenimit unitsinneqarpoq. Tamanna inatsisartut sulinerannut akuliunneruvoq, naak Naalakkersuisut siulittaasuat Inatsisartut sulinerannut akuliuttussaanngitsoq, Jens B. Frederiksen oqarpoq.

Efterskolimut ilassutitut aningaasaliinermi kukkusoqarsimanera Inuit Ataqatigiinnit ajuusaarutigineqarpoq, inatsisilerituulli inerniliinera ataqqineqartariaqartoq aamma oqaatigineqarpoq. Inatsisartunut ilaasortaq Olga P. Berthelsen ima oqarpoq:

- Suliamut suliarinninnerup iluani kukkusoqarsiamnera soorunami uggornarpoq, aamma nalunaarusiap ersersippaa suliami tassani kukkusoqarsimasoq. Tamanna Inuit Ataqatigiinniit aallaqqaataaniilli ilimagereersimavarput, Olga P. Berthelsen oqarpoq, nangillunilu:

- Inatsisilerituup naliliinera assortoruminaappoq, aamma politikkikkut qanoq atorniassagaluaraanni. Taama inatsisilerituumit naliliineq Inuit Ataqatigiinnit tunngavigissagipput uanga isumaqarpunga, Inuit Ataqatigiit sinnerlugit inatsisartunut ilaasortaq Olga P. Berthelsen taama oqarpoq. Qasigiannguit Efterskoliannut aningaasaliinissami kukkusoqarsimanera Naalakkersuisut siulittaasuata Hans Enoksenip ajuusaarutigaa, naalakkersuinikkut allaffissornikkullu siunissami taamaalisoqaqqinnginnissaa aamma sulissutiginninniarnini oqaatigalugu.