Qasigiannguit efterskoleqarfinngussaaq

Qasigiannguit nunatsinni efterskoleqarfinngortussanngorpoq.

Ilinniartitaanermut Pisortaqarfimmit paasitinneqareerluni Qasigiannguit kommuneat taama nalunaaruteqarpoq. Efterskoleqarfinngornissartik siunissaminnik qularnaarisoq, Qasigiannguani borgmesteri Jes Svane nuannaaqisoq oqarpoq:

-Akuerineqartorlu imaannaattorujussuuvoq, nunaqqatigut ullumikkut erfalasulersorput, qummoroortartut aallakaatinneqarput, biilillu aqqusinermi siggartarput. Qasigiannguit siunissaata ajunngitsumik isigineqalernera uppernarsarneqarpoq.

Efterskolissaq 80-inik aturtoqassaaq ilinniartitsisussaalu 18-it missaannissaput, taakkulu illoqarfimmi inuussutissarsiornerup ineriartulerneranik kinguneqassapput. Soorlu pisiassat amerlanerulissapput pisiniarfinni allanilu atorfissaqartuni sulisussat atorfissaqartinneqalissapput.

Inuusuttuaqqat Qasigiannguanut eftrskoleriarumaartussat sunngiffimmi susassaqartinneqarluarnissaat pingaaruteqarmat kommuneaamma piareersaasiulereersimavoq, aallaqqaammut pisariaqartussat pillugit inuusuttuaqqat tusarniaaffigineqassallutik.

Qasigiannguit kommuneata aammalumi innuttaasut tamakkerlutik efterskoleqarfiulernissaminnut ilungersoqataasimanerat pilersaarusiorluarsimanerlu toqqagaanerminnut pissutaanerpaasut Jes Svane oqarpoq, aammali avannaani kommuneq1arfiit allat tapersersuisimanerat aamma pissutaaqaalluinnartoq oqarpoq.

Qasigiannguit saniatigut kommuneqarfiit allat sisamat efterskoleqarfissatut aamma neqerooruteqarsimagaluarput.

Qasigiannguit borgmesteriata Jes Svanep ulloq nalliussiniarlugu innuttaasut katersortarfimmut tassuugu arfineq marluniit kaffisoriaqquvai.