Qasigiannguani Politiit arlalinnit saaffigineqarput
Qasigiannguit illoqarfianni sisamariarluni ikuallatsitseriaraluarnerit pillugit Qasiannguani Politiit arlalinit saaffigineqarput.
oktobarip 18-at 2007 17:02
Paasissutissat pissarsiatik tunngavigalugit politiit paasiniaanertik maanna ingerlappaat, politiillu ittuat, Jørgen Nedergaard, isumalluarpoq:
-Saaffiginnissutit naammagisimaarpakka, oqarpoq.
Ikuallatsitseriarnerit annertunngitsut, kingunipiloqarsinnaasimagaluartulli, sapaatiummat unnukkulli aallartipput.
Taamaammat politiit ikuallatsitsinerit pillugit inunnik ilisimannissinnaasunik takunnissimasinnaasunilluunniit ujartuipput, Radioavisi ilaatigut aqqutigalugu.
Jørgen Nedergaardip ilaatigut eqqaavaa, atuartut ukiaanerani atuanngiffeqarnerat pissutigalugu inuusuttuararpassuit aqqusinerneerrattarmata, tamakku arlaat immaqa takusaqarsimasinnaasoq.
