Qasigiannguani nakorsaaneq peqataarusunngilaq

Inuk katsorsarneqarsinnaanngivissumik napparsimappat peqqinnissaqarfimmit ikiorneqarluni toqumut ikiorneqarnissaa nunatsinni nakorsaanerit ilaata qaquguluunniit isumaqatigilernavianngilaa.

Inuunerup kipineqarnissaanut ikiuussinnaaneq Olga P. Berthelsenip nunatsinni periarfissaalersussatut angorusuppaa, assullu inuiaqatigiinni oqallisigillaqullugu. Qasigiannguani nakorsaaneq Lars Mosgaard - oqallinnissamut tikilluaqqusigaluarluni, inummik allamik toqutsinertut isigisaminut peqataarusunngilluinnarpoq.

Uanga inuunerup maanaannakkut kipineqarnissaanut ikiuunnissamut akerliulluinnarpunga. Aamma maani nunarsuarmi sulininni taanna suliassarinngilara. Uanga ileqqussatut isigisara taamaappoq, Nakorsaaneq Lars Mosgaard Qasigiannguani ukiuni 30-ngajanni sulisuusoq oqarpoq.

Mosgaardip inuuneq qanorluunniit ikkaluartoq ataqqineqartariaqarsoraa, allap akuliuffigisassarinngisaa.

- Soorunami nakorsatut sulininni naammattoortarpakka inuit eqqisseqqunaraluartut, kisianni inuutillunga inuup allap toqunissaanut ikiuunnavianngilanga. Toqunissamut ikiorsiisarneq nunami maani eqqunneqassagaluarpat, uanga peqataanissara naaggaarpara. Soraassaanga, oqarpoq.

Toqulersorpassuit sivikitsumik sivisuumilluunniit allaallu immaqa anniangaarlutik toqujartortut, najortareerlugit oqarsinnaanerarpoq, allatut ajornavikkaangat katsorsaaneq nakorsaasersuinerluunniit unitsittariaqartarlugu, taaamaattoqassatilluguli nammineq suleqatimilu ileqqorissaarnissamut maleruaqqusat atuuttut - ilaqutaasut peqatigilluinnarlugit - nalilersoqqissaartaritik.

- Inuunerulli kipineqarnissaanut ikiuunnissaq inatsisitigut pisinnaatitaaffinngussappat uanga toqutsinertut tamanna isigissavara, soorlu naartuersinneq inuunermik kipititsinertut isigigaluarlugu allatut ajornartumik suliarisariaqartariga.

Lars Mosgaard oqarpoq, inuk qaqugu toqussanersoq nammineq akuliuffissarinagu tamannalu ersinngitsup piumasaata imaluunniit Guutip isumassuinerata imaluunniit suugaluarnersup isumagisassarigaa.

Nakorsaanerup aamma ilimaginngilaa inatsisartunut ilaasortap Olga P. Berthelsenip inuunerup kipineqarnissaanut peqqinnissaqarfiup ikiuussinnaalernissaanik oqaatigisai, nunatsinni atuutilersinneqarsinnaasut.

- Nakorsat arlallit uattut suleqataajumanavianngillat, allaallu ilimagisinnaavara inuunermik ikiuilluni kipititsisarneq Kalaallit Nunaanni eqqunneqaraluarpat, peqqinnissaqarfimmi atorfiit inuttassarsiornerat ullumikkornit ajornakusoornerulissasoq. Kisianni, ajunngilaq, oqallisigineqarniarli. Lars Mosgaard naggasiivoq.

Ileqqussat pillugit Eqqarsaqatigiit assigiinngitsunik suliaqartunik sinerissamit tamarmeersunik 13-inik inuttaqartup siulittaasua Carl Christian Olsen, Pujo, oqarpoq, inuunermik ikiuilluni kipititsisarneq eqqartukkaminnut suli ilaanngitsoq. Oqaluuserisartakkatillu tassaanerarpai, naalakkersuisut, naliliiffigisassatut oqaluuseritinniagaat.