Qasigiannguani Kangaatsiamilu mittarfiliornissanut SIS akerliuvoq

Partiip Siumut inuusuttunut suleqatigiiffia, SIS, Qasigiannguani Kangaatsiamilu timmisartunut suluusakinnerusunut mittarfiliortoqarnissaanik kissaateqarnermut akerliuvoq.

- Kangaatsiami Qasigiannguanilu innuttaasut angalasut amerlanngimmata, isumaqanngilavut taama mittarfiliortoqarneratigut innuttaasut angalanerulissasut, Siumut inuusuttunut suleqatigiiffiani siulittaasoq, Mads Petersen, allappoq.

Tamanna pillugu Qasigiannguani Kangaatsiamilu timmisartunut suluusakinnerusunut mittarfiliornissat immikkut ulluligaanngitsumut kinguartinneqartariaqartut, Mads Petersen isumaqarpoq.

-Pingaarnerutipparput, Qasigiannguit Kangaatsiallu kommuneqarfiisa nunami aningaasarsiornikkut kaaviaartitsinermut tunniussaqarluarsinnaalerpata aatsaat apeqqut tamanna qaqinneqaqqissasoq, Mads Petersen oqarpoq.

SIS-mi siulittaasoq aamma isumaqarpoq, timmisartunut suluusalinnut minnernut mittarfiliortoqarnissaa pingaaruteqanngitsoq.

- Eqaallisaavigineqarnavianngimmat maannakkutut inissisimaneq eqqarsaatigalugu, timmisartut qulimiguullit illoqarfinni taakkunani maannamut aningaasartuuteqarfioreersut mittarfeeqqanit matussuserneqarnavianngimmata.

Qasigiannguani Kangaatsiamilu meeqqat, inuusuttut utoqqaallu atugarisaannik pitsanngorsaanissaq illuatungaatigut pisariaqarnerusoq Mads Petersen isumaqarpoq.

Qasigiannguani Kangaatsiamilu mittarfiliornissat kinguartillugit, Qeqertarsuarmili mittarfiliornissaq, SIS-mit isumaqataaffigineqarpoq.

Mads Petersen isumaqarpoq Qeqertarsuarmi imermik avammut tunisassiornissaq qularnarunnaariartormat, sikussagaluarpallu, tunisassiat apuunneqarfissaannut apunneqartarnissaat qulakkeerniarlugu, mittarfiliortoqartariaqartoq.