Qasigiannguani ikuallatsitseriaqattaarneq
- Inuit ikuallatsitseriarnerit nalaanni maluginiagaqarsimasut imaluunniit putsumik naamasaqarsimasut attaveqarfigerusuppavut, nunatsinni politimesterip tullia Morten Nielsen allappoq.
Sapaatiummat oktobarip 14-anni nalunaaqutaq 23.38 klubbip silataani eqqaavimmi ikuallattoqarnera nalunaarutigineqarpoq. Inneq ussattunit politiinillu qaminneqarpoq, qatserisartunillu qamilluarneqarluni.
Aqaguani ataasinngornikkut nalunaaqutaq 21.58 kommunip sannavitoqaani atuarfiup eqqaaniittumi ikuallatsitsisoqartoq nalunaarutigineqarpoq. Ikuallatsitsineq meeqqat ilaannit paasineqarpoq, inersimasumillu saneqquttumik saaffiginnipallakkallartillugit qaminneqarpoq.
Unnuaq taanna kingusinnerusukkut – marlunngornikkut ullaassakkut nalunaaqutaq 03.59 eqqaavik politeeqarfiup silataaniittoq ikuallattoq nalunaarutigineqarpoq. Nalunaaruteqartup ikuallatsitsineq nammineerluni qamisarsimavaa, kingornatigullu qatserisartunit qamilluarneqarpoq.
Unnuami tulliuttumi – pingasunngornermi oktobarip 17-anni ikuallatsitseriartoqaqqippoq. Unnuami marlunut qiteqquttoq eqqaavik illumut nivingasoq, politeeqarfiup ungasinngisaaniittoq ikuallattoq nalunaarutigineqarpoq. Politiip inuinnartut atisallip pisuinnartup ikuallatsitsineq naammattoorpaa eqqaavillu ikuallattoq nivingaffianit katatseriarlugu qamisarsinnaasimavaa.
Inuit ikuallatsitsinernut ilisimannittut imaluunniit pasitsaassaqarsimasut Qasigiannguani politiinut oqarasuaat 91 12 22-mut, tassa 91 12 22-mut saaffiginneqquneqarput.
