Qasigiannguani efterskolissamut aningaasaliinermut misissuisitsineq isornartoqarpoq

Taama oqarpoq Demokraatit siulittaasuat Jens B. Frederiksen, misissuititsinermi apeqqutit suut akineqassanersut naalakkersuisut nammineerlutik aalajangersareeraallu.

- Misissuititsineq isornartulerujussuuvoq, tassami kikkunnulluunniit attuumassuteqanngitsutut oqaatigineqarsinnaanngilluinnarami.

Demokraatit siulittaasuata kukkunersiuinermullu ataatsimiititaliami ilaasortap, Jens B. Fredriksenip naalakkersuisut efterskoleliornissaq pillugu inatsisilerituunik misissuititsiniarnerat taama oqaatigaa. Misissuititsineq aallartinneqarpoq, kukkunersiuisartut Deloittekkut isornartorsiuillutik nalunaarusioreersullu, tassani oqaatigineqarmat Kulturimut Ilinniartitaanermullu Naalakkersuisoqarfiup, ilaatigut naalakkersuisut siulittaasuata ilisimasaqarfigisaanik, paasissutissat aningaasaqarnermut ataatsimiititaliamut isertuunneqarsimasut, tassa Qasigiannguani efterskoleliornissamut atatillugu 11 millionit koruuninik immikkut aningaasaliisoqarneranut atatillugu.

Naalakkersuisut nammineerlutik inatsisilerituunit misissuititsinissaq aallartikkamikku, arlaannaannulluunniit attuumassuteqanngitsutut taavaat, tassagooq immikkut ilisimasalimmit kikkunnulluunniit attuumassuteqanngitsumit suliarineqassammat, aamma naalakkersuisut siulittaasuata kukkunersiuinermut ataatsimiititaliap ilaatinneqarnissaa oqaatigimmagu. Kisianni tassa naalakkersuisut misissuisussat siuttussaat nammineerlutik maanna toqqarpaat, apeqqutillu misissuinermi akineqartussat nammineerlutik apeqqusiorpaat. Taamaattumik Demokraatit siulittaasuata misissuititsineq kikkunnulluunniit attuumassuteqanngitsutut taasinnaanngilaa.

- Matumani suut misissuiffigineqassanersut naalakkersuisut nammineerlutik aalajangersarpaat, misissuinerlu naalakkersuisunut namminernut naalakkersuisullu inatsisinik unioqqutitsisimasinnaanerannik misissuinerusussaammat, isornarluinnarpoq naalakkersuisut kisimiillutik misissuinissap imaanik aalajangersaammata, Jens B. Frederiksen oqarpoq.

Inatsisilerituunik misissuititsinikkut naalakkersuisunut ilaasortat inatsisinik unioqqutitsisimanersut qulaajarneqarnissaa siunertaagaluarpoq, tassami efterskoleliornissamut immikkut aningaasaliissutissat pillugit paasissutissanik, Inatsisartuni oqallinnissamut atugassanik, isertuussisoqarsimavoq.

- Kukkunersiuinermut ataatsimiititaliap ilaatinneqannginnera ajorluinnarpoq. Taakkuami ilaagarluarpata, misissuinerup inernera kimittunerussagaluarpoq, maannakkulli misissuineq aallartinngitsorluunniit inernera apeqqusersinnaalereerparput, Demokraatit siulittasuat kukkunwersiuinermullu ataatsimiititaliami ilaasortaq, Jens B Frederiksen, oqarpoq.

Misissuisussat kikkuunissaat aqagu saqqummiunneqassagunarpoq.