Qarsutsinerup kinguneri ullut tamaasa ajorsiartorput

Pakistanimi pissutsit ajortilluinnarnerat UNICEF-ip maanna suaarutigaa. Røde Korsip Pakistanimi aallartitaata Hans Gregersenip iliuuseqartoqartariaqarnera aamma oqaatigaa.

- Qaammatit marluk matuma siornali qarsutsineq aallartikkaluartoq suli ajunaarnersuaq qaangiutinngilaq, Gregersen oqarpoq.

Nunarujussuaq suli erngup ataaniippoq. Inuppassuit pisarialinnik ikiorneqarnatik avinngarusimalluinnartuniipput.

Taakku naammattunik nerisassaqanngillat pissutsillu suli taamaatsillugit nerisassanik assartuinissaq ajornarluinnarpoq, Gregersen oqarpoq.

Nerisassaaleqinermi meeqqat eqqugaanerpaapput. Meeqqat naarujussuallit amitsuararsuarnillu avatillit, meeqqallu nerisinnaajunnaareersimasut UNICEF-imiut oqaluttuaraat.

Qarsutsinersuaqarmat inuit 20 millionillit inuuniutissaarulluinnarput. Millionilikkuutaat angerlarsimaffeqanngillat 40-nillu kiattoq maaniinnarmiillutik.

- Taamatut pisoqartarneratut meeqqat sakkortunerpaamik eqqugaapput, Hans Gregersen oqarpoq.

Meeqqat angerlarsimaffissaqarnatillu nerisassaqannginnamik soorunami napparsimalerput.

- Ullaap tungaani illoqarfeerannguamiippugut naalungiarsuillu marluk malariamik nappaateqartut takuagut nappaallu taanna toqussutigeriaannaavaat, Gregersen oqaluttuarpoq.

Meeqqat amerlaqisut ajunaarnersuup siornali perleqqajaallutik inuusut maanna annariarfissaarussimapput. Anaanarpassuillu immuerutereerput, taakkumi aamma nerisassaqannginnamik.