Qarsoq Høegh-Dam: Ikiaroornartumut tunngasoq parteeqatinnut oqaluttuarinikuunngilara
Inatsisartutut atuuffimmut pinngitsiarluni ilaasortaajunnaartup Qarsoq Høegh-Dam-ip ikiaroornartumut tunngasumik Nunatta Eqqartuussiviani eqqartuussaasimanini parteeqatiminut oqaluttuarisimanngisaannarlugu KNR-imut oqarpoq.
Qarsoq Høegh-Dam Inatsisartut tallimanngormat inissitsiterfiusumik ataatsimiinnissaat nalunaaquttap akunnerinik tallimanik sioqqullugu inatsisiliortutut atuukkusukkunnaarluni, Facebookkimini allappoq.
Taassuma Siumumut ilaasortaqatini qineqqusaaqatinilu ikiaroornartumik 49 grammimik tuniniagassaasorisamik 2015-imi toqqoqqasaqarsimanini eqqartuussaasutiginikuullugu oqaluttuussimanngisaannarpai.
AAMMA ATUARUK Qarsoq Høegh-Dam: Suliaq inummut aallaaviunani politikkikkut aallaaviussaaq
Unnerluussut taanna Nunatta Eqqartuussiviani 2019-imi oktobarimi suliareqqinneqarpoq, ikioroornartorli angerlarsimafianiittoq tuniniagassaanersoq uppernarsarneqarsinnaasimangilaq. Suliarlu aalajangiiffiginiaaruusaarneqarmat Qarsoq Høegh-Dam 1500 koruuninik akiliisussanngortinneqaannarpoq.
- Toqqaannaq imatut oqalugiassutiginikuunngilara, kisianni aamma eqqaamasakka malillugit tusagassiorfinni qaqinneqatallannikuuvoq. Taamaammat inuit qaaqqoriarlugit oqalugiarlunga taamannak saqqummiunnikuunngilara, Qarsoq Høegh-Dam KNR-imut oqarpoq.
Aarlerisoq
Taanna nammineerluni Inatsisartunut ilaasortaanissaminut naleqquttutut misigigaluarpoq. Kisianni Inatsisartuni amerlanerussuteqartunit qinikkatut naleqqutinngitsutut nalilerneqarnissani aarleqqutigalugu, ammaanersiorneq sioqqullugu tunuarniuteqarluni nalunaarpoq. Taamaalilluni qinikkatut atuunnissaa naleqquttuunersoq Inatsisartut ataatsimiittarfianni oqallisigineqanngilaq.
Siumumilu qinigaanerpaat sisamaattut inissikkaluarpoq, inunnit 796-init inatsisilioqataasussatut piukkunneqarluni.
- Taamak qinerneqartiginera soorunami tupaallannarlunilu nuannerpoq. Kisianni aamma qanorluunniit inuk qinigaatigisamagaluarpat tamat oqartussaaqataaneranni Inatsisartut amerlanerussutillit naalagaapput, kina ataqqinartutut isigissanerlugu tassa inatsisartuusinnaanersoq. Qujamasuutissaqarfigigaarlugit oqarsinnaavunga.
Politikkikkut siunnersortitut suleqqissinnaasoq
Taassuma siunissami sulerissanerluni suli akiuminaatsippaa, politikkilli silarsuaaniiginnarnissani takorloorsinnaallugu.
- Politikkimut arlaatigut qanittarpunga siunnersortaallunga sulillunga, naluaraluunniit immaqa taakaniiginnariasaassanerlunga arlaatigut siunnersortitut. Nalunarpoq kisianni inuuneq ingerlaqqissaqqaarpoq. Politikkimi siunissaq qanoq issanersoq nalunarpoq, Qarsoq Høegh-Dam oqarpoq.
Qaarsuneersoq Karl Tobiassen 111-inik qinersisilik Qarsoq Høegh-Dam-ip atuuffimminit tunuarneratigut Inatsisartunut ilaasortanngorpoq.
