Qarmarsuup atorunnaarsitaaanera nalliuttorsiutigineqarpoq
Ivalo Frank Kalaallit Nunaanni inunngortoq kalallinullu tunngasunik arlalinnik filmiliortarsimasoq ukiuni kingullerni qulingiluani Berlinimi najugaqarpoq. Ullumi ullup nuannaarutigineqarnera malugisimagaluarlugu ukiut 20-t ataatsimuulernerup kingornatigut kangiani kitaanilu kulturikkut assigiinngissuteqarneq malugisimavaa, isumaqarlunilu maani Kalaallit Nunaanni tamanna aamma nalunngingaaratsigu anngaaginnarsinnaagipput.
- Ilinniarfigisinnaasaq tassa kulturit marluk ataatsimuuleraangata kulturi allamut nuunneqaannarsinnaanngimmat. Pilertorpallaamik ingerlariarnissaq mianersuuttariaqarpoq eqqaamaneqassallunilu kulturini taakkunani marluusuni eriagisarialinnik peqarmat ataatsimullu ingerlanneqarnissaat ilinniarneqartariaqarluni, Ivalo Frank oqarpoq.
Tysklandimi tyskit kangilliit kulturiat qanganisaavallaartoq tunuarsimaarpallaartorlu, tyskillu killiit kulturiat kisimi pitsaanerpaajusoq isumaqaqqajaasoqartarpoq.
- Oqaluttuaq taamaattoq maani Kalaallit Nunaanni nalunngingaaratsigu anngaaginnarsinnaavugut, tassami Danmarkip aamma qallunaat aqutseriaasiat qallunaanullu maligassiat eqqussimammagit.
Tamannarpiaavorlumi maanna allanngoriartulersoq, kalaallini eriagisariallit aammalu imminut naleqassusermik imminullu tatiginermik pilersitsinissamut pingaaruteqartut ilanngullugit suliariniarneqalermata, innuttaasullu namminneq oqaluttuarisaanerminnut sorlaqalersillugit.
Ivalo Frankip inuusuttut kinguaariit siornatigut Tysklandimi kangillermiuusimasut pingaartumik malugisimavai ataatsimuulinngikkallaramik ajukkutiinnaratik perruumaataarutitik akuerineqarnissartillu annertusalermatigik. Tamanna ilaatigut eqqumiitsuliornermi kulturimilu takuneqarsinnaavoq, kalaallini inuusuttuni eqqumiitsuliortunisorluinnaq.
- Tysklandimi kangillermi eqqumiitsuliortut nalunngilluinnarpaat ataatsimuulinngikkallaramik suusupagineqarsimallutik igiinnagassat. Tysklandimi kangilliusimasumi kulturitoqaq ataqqineqarneruleriartorpoq, taama oqarpoq filmiliortartoq Ivalo Frank, taassumalu filmiliaa nutaaneq "Faith, Hope and Greenland" - Kalaallit Nunaanni kulturikkut inuunermik imaqartoq ungasinngitsukku KNR-TV-mi takutinneqartoq, Tysklandimi illoqarfimmi Lübeckimi nunat avannarliit filminik takutitsineranni iluatsitserujussuarpoq.
