Qarasaasiatigut saassussinerup KNR susinnaajunnaarsikkaa
![](/sites/default/files/styles/image_934x467/public/2023-11/7V9A0627-Enhanced-NR.jpg?itok=-36jK_xF)
KNR-imi sulisut decembarip arfineq-pingajuanni tallimanngornermi suliartoramik tusagassiorfik suliaqarfiusinnaanngilaq.
KNR-imi arfineq-pingasunngunngitsiartoq qarasaasiatigut saassunneqarpoq. Taamaammat qarasaasiat imminnut atassusilikkat qaminneqapallapput, saassussinerlu annertunerusoq pinngitsoortinneqarluni.
Taamaakkaluartorli tamanna KNR-imut tallimanngornermi sapaatillu akunnerata naanissaata tungaanut susinnaajunnaarsitsivoq, tamanna pissutigalugu decembarip arfineq-pingajuanni radiaviisip aallakaatinneqarnissaa immiuteriigaavoq Qanoruullu aallakaatinnissaa taamaatinneqarpoq.
Naak serveri ataaseq eqqorneqarnikuugaluartoq KNR-ip qarasaasiai sapaammi decembarip qulingani atorneqaqqissinnaalerput, tusagassiortullu taamaalillutik ataasinngornermi nalinginnaasumut suliartorsinnaallutik.
Qarasaasiatigulli saassussineq annertuumik kingunerluuteqarpoq, apersuinerpassuit radioaviisimilu ilanngutassiat suliareriikkat ilaatigut annaaneqarput. Taamaammat radioaviisip pingasunngornermi decembarip 13-ianit tallimanngornermut decembarip 15-ianut ullaakkut arfineq-pingasunut aallakaatinneqartannginnissaa aalajangerneqarpoq.
Nittartagaq knr.gl saassussinermi eqqorneqanngilaq, taamaammat nutaarsiassat nalinginnaasumik saqqummersinneqarsinnaasimapput. KNR-tv-lli radiollu attaveqaataatigut aallakaatitsisoqarsinnaanngimmat tv aamma radio toqqaannartoq KNR.gl-ikkut aamma aallakaatinneqanngillat. Aallakaatitassalli on demandiusut tassa piareersimareersut nalinginnaasumik aallakaatinneqarsinnaapput.
Saassussineqaqqinnissaq aarlerinarnera
Qarasaasiatigut saassussisunit saassussisoqaqqissinnaanera pissutigalugu KNR-imit pisup tamanut tusarliutiginissaa tunuarsimaarfigineqarpoq.
Pisoq Datatilsynetimut politiinullu nalunaarutigineqarpoq Center for Cybersikkerhedilu ilisimatinneqarluni.
KNR qarasaasiatigut pitsanngorsaataasussanik ilaatigut aallakaatitassiornermut sillimaniarnissamullu atortunik, paasissutissanik suliaqartarfinnik suliffimmilu tamarmi qarasaasiat imminnut atassusilerneqarnissaannut atortunik arlalinnik ukiap ingerlanerani pisiortorpoq. KNR taamaalilluni saassussinernut assingusunut maanna sillimaniarnerulersinnaassalluni.
Suleqatigisat aammalu sulisorisat immikkut ilisimasaqarnerat pillugit immikkut ittumik qujassutissaqarfissaapput, taakkumi ilaatigut assammik arsarnermi nunarsuarmi pissartanngorniunnerit TV-kkut aallakaatissinnaanissaannut periarfissaqartitsipput.