Qarasaasiat atulerniarpaat

Kalaallit Nunaanni napparsimmaveqarfinni tamani qarasaasiaq atorlugu napparsimasunut nalunaarsuisarneq inerisarneqaleruttorpoq:

Godmann Filemonsen Paasissutissiissaaq:

Ukiortaanngitsiarnerani napparsimmaveqarfinni tamani qarasaasiaq atorlugu napparsimasut nalunaarsorneqatalernissaat suliarineqaleruttorpoq – Dronning Ingridip Napparsimmavissuanili qarasaasiaq atorlugu nalunaarsuisalernissaq kingusinnerusukkut aatsaat atorneqalissaaq. Computerworld-imiit taama tusagassiisoqarpoq.

Ilanngullugu oqaatigineqarpoq Kalaallit Nunaata qarasaasiaq atorlugu napparsimasunik nalunaarsuisalernermigut Danmarki atortorissaaruteqarnikkut qaangissagaa, tassami Danmarki taamatut nalunaarsuisalernissaminut suli kingulliungaatsiarmat.

Siornatigut pappialat atorlugit journalinik nalunaarsuisoqartarallarmat napparsimmaviit allaffiini nalunaarsukkat qaleriissarsuanngortarput.

Siunissami napparsimmaveqarfinni sulisut qarasaasiakkut napparsimasut allassimaffii najoqutaralugit napparsimasut nalunaarsorsimaffii takuinnartalissavaat.

Aasianni napparsimmavik maajimili qarasaasiaq atorlugu napparsimasunik nalunaarsuisalersimavoq, misilittakkallu takutippaat taamatut journalinik nalunaarsuisarneq pitsaasuusoq.

- Qarasaasiaq atorlugu nalunaarsukkat tammaaneqarneq ajorput, piffissarlu angisooq atorlugu ujartuisoqassanani. Nakorsap paasissutissat pisariaqartitani piffissaq eqqorlugu maannakkut takuinnarsinnaalissavai, nakorsap allataa, Charlotte Pedersen, Computerworldimut taama oqarpoq.

Qarasaasiaq atorlugu nalunaarsuisalernissaq sinerissami peqqissaasunut aamma iluaqutaasussaavoq.

- Sinerissami qarasaasiaq atorlugu nalunaarsuisarnerit tamarmik imminnut atassusersorneqassapput toqqaannartumillu qarasaasiakkut nalunaarsukkanik allattuiinnartalertussaallutik, siornatigut skrivemaskina atorlugu allattuisoqartaraluarpoq paasissutissallu napparsimmaveqarfinnut faxekkut ingerlateqqinneqartarlutik.

Aasiaat peqqissaaveqarfianni nakorsat qullersaat,

Jørn Breinholt, taama naggasiivoq.