Qarasaasiarsuartaarnikkut silassamik ilimasaarutit pitsaanerulersinniarneqartut
Qarasaasiartaarsuup pissarsiarineratigut naatsorsuineq qaraasaasiamut maannamut pigineqartumut naleqqiullugu pingasoriaammik sukkanerulersinniarneqarpoq, qarasaasiarlu Islandimi inissinneqassaaq, sila tamaani Europami nunanut allanut naleqqiullugu kiappallaarneq ajormat.
- Innaallagissamut qarasaasiallu kissattoornaveersaartinneqarnissaanut aningaasartuutit ikinnerussapput, nukissiuutit ataavartut atornerisigut aningaasartuutit affaannaassallutik, Islandimi silap pissusia pissutaalluni aningaasartuutit ikinnerussallutik, DMI-mi qarasaasialerinermik pisortaq Thomas Kjellberg Christensen, tusagassiuutinut nalunaarummi ilaatigut taama allaaserisaqarpoq.
Silassamik ilimasaarutit eqquunnerusalersikkusukkaat
Qarasaasiarsuaq Danmarkimut Naalagaaffeqatigiillu sinneranut, Kalaallit Nunaannullu, silassamik ilimasaarutinik pisarneq malillugu tunniussisarumaarpoq, ilimasaarutillu eqquunnerunissaat neriuutaalluni. Qarasaasiarsuup inissinneqarfia pissutaalluni silassamik ilimasaarutit eqquunnerulernavianngillat, qarasaasiarsuulli sukkanerusumik pitsaanerusumillu naatsorsuisinnaanera pissutaalluni.
- Nunarsuup silaannartaa pillugu eqquunnerusumik siunissami ilimasaaruteqartalissappat qarasaasiaq nutaaliaalluinnartoq pisariaqartinneqarpoq, supercomputerimik taaneqartartumik peqarnissaq pisariaqarluni, Thomas Kjellberg Christensen, DMI-meersoq, oqarpoq.
Qarasaasiarsuup Islandimi inissinneqarnissaa marlunnnut avinneqarnikuuvoq, siullermik 2016-imi, ikkussorneqarneralu 2018-imi naammassineqassangatinneqarluni.
Qarasaasiarsuartaarnikkut DMI-p sumiiffimmi qulaani nalunaaqutserneqarsimasumi eqquunnerusumik silamik ilisimasaarisalissaaq, tamannalu kalaallinut islandimiunullu iluaqutaalluassaaq. Najoqqutarisaq: DMI.