Qarasaasiaanut pulalluni pinerliiniartoqarneratigut Namminersorlutik Oqartussat IT-kkut attaveqaasersugaanerat matuneqartoq

Qarasaasiatigut saassussisoqarneratigut Namminersorlutik Oqartussat attaveqaasersugaanerat matuneqarpoq. Naalakkersuisoqarfimmi pisortaaneq Hans-Peder Barlach Christensen KNR-imut taama oqarpoq.

Attaveqaasersuutilli 90 procentii maanna ingerlaqqilersimanerarpai.

- Qarasaasiaqarfigut avataaninngaannik pulaffigineqarsimagamik, paasissutissanik aalleriartorfiginiarsarineqarlutik, Hans-Peder Barlach Christensen oqarpoq.

- Paasivarput ajoquserujussuarneqarsimanata, kisianni suna tunngaviunersoq suminngaanniinnersullu oqaatigisinnaanngilakka.

Inatsisartut ataatsimiinnerat aamma eqqugaasoq

IT-kkut attaveqarnermik matusigallarneq Inatsisartut ataatsimiinnerannik sapaatip akunnerani uani unitsitsigallarnermik aamma nassataqarpoq.

Attaveqaasersuutinik matusigallarnermi Inatsisartut sulinerminni atugassaannik naalakkersuisoqarfinnit nassitsisoqarsinnaasimanngilaq.

Namminersorlutik Oqartussat tallimanngormat nalunaarput attaveqaasersuinermi sillimaniarnermik unioqqutitsisoqarsimanera paasineqartoq.

Ajoqusiineq pakkersimaarniarlugu misissorniarlugulu avammut attaveqarneq tamarmi matuneqarpoq, matusinerlu peqqutigalugu Namminersorlutik Oqartussat nittartagaat, soorlu sullissivik.gl atorneqarsinnaajunnaarallarput.

- Susassaqanngitsut avataaneersut attaveqaasersuutitsinnut isertussaatitaanngillat, taamaammallu qarasaasiat imarisaannik saliisoqarnerani avataanut attaveqarneq tamarmi matoqqatinneqarpoq, Hans-Peder Barlach Christensen oqarpoq.  

Nammineerluni immersugassaq immaqa aamma eqqugaavoq

Attaveqaasersuutinik matusigallarneq amerlasuunut eqquisoq isumaginninnikkut pisartakkanut kinguaattoortitsimmat pisartakkat kommunimukaqqaarluni pineqarsinnaapput - nammineerlunilu immersugassamut tunniussivissaq aamma kinguarpoq.

- Suli nalugallarparput akileraartarnikkut nammineerluni immersugassamut tunniussivissaq kingulleq kinguartittariaqassanersoq. Allanut tunngatillugu tunniussivissatut killigitaasut paasissutissartaat suli piginnginnatsigit, innutaasunut eqquilaarsinnassapput, immaqa ullormik ataatsimik, marlunnik pingasunilluunniit kinguaattoortitsillutik.

- Kisianni qujanartumik annerusumik annaasaqannginnatta, taamaattumik qanoq kinguaattoortiginerluta apeqqutaaginnarpoq. Hans-Peder Barlach Christensen oqarpoq.

Qarasaasiatigut attaveqarnerup ullup ingerlanerani tamakkiilernissaa naatsorsuutigaa.

- Ilungersunartorujussuartut tiguarput. Attaveqaateqarfiit tamarmik misissorneqarput- sillimaniarnermut upalungaarsimanermullu attuumassutillit tamavimmik misissorneqarput, siunissami taamaattoqaqqinngissaa soorunami pillugu.

Qanoq ililluni ilumut taamatut pisoqarsinnaagami?

- Qarasiaatigut assigiinngitsutigut saassussisartut pikkorissorujusuugamik. Royal Greenland kingullertigut eqqugaavoq, maannalu uagut. Qarasaasiatigut pinerliiniartartut nunarsuaq tamakkerlugu pikkorissorujussuusaramik.

Royal Greenland qarasaasiatigut decembarimi saassunneqarmat sulisuinut ilaannakortumik akissarsititsisoqartariaqarsimavoq, attaveqaasersuutaali maanna pissusissamisoortumik ingerlaqqilersimapput.