Qaqqatoqarsuit ilisimasassarsiorfigaat

Isua Nuummiit avannamut kangimut 150 kilometerisut ungasitsigaaq, nunarsuatsinnilu immikkuullarinnerpaalluni. Tamaanimi ujaqqat nunarsuatsinni qanganisaanerpaat nassaassaapput. Ujaraqarfik ’70-ikkunnili nassaarineqarmat, ilisimatuut sumi tamaanngaanneersut ulloq manna tikillugu misissuiartoqattaartuarput. Københavnip Universitetianersoq, Professor Minik Rosing, ilisimatuunut tamakkununnga ilaavoq.

- Nuna tamanna ukiunik 3,8 milliardinik pisoqaassuseqarpoq, misissorneratigullu taamanersuaq nunarsuatsinni pissutsit qanoq ittuusimanersut, nuna immamik qallerneqarsimanersoq, uumassusilinnillu nassaassaqarsimanersoq paasineqarsinnaavoq.

Taamaalilluni, Isua nunarsuatsinni ornitassat soqutiginarnerpaat ilagaat, Minik Rosing oqarpoq.

Ukiut tallimat matuma siornagut Minik Rosingip nunarsuatsinni uumassusillit siulliit takussutissartaat nassaarigamigit uissuummisitserujussuarpoq.

- Taamani iluatsitsillunga, ukiut 3,8 milliardit matuma siornagut nunarsuatsinni uumassusillit siulliit qanoq ittuusimanerat takussutissarsivakka, naak tamatuma siorna taamanersuaq uumassusilinnik nunarsuatsinniittoqarsimanissaa ilimagineqanngilluinnaraluartoq, Minik Rosing oqarpoq.

- Nunarsuatsini sumiiffinni allani, soorlu Afrikami, qanganisarujussuarnik ujaraqarfiit erlinnartunik assigiinngitsunik, soorlu kuultimik, qalluiffiusinnaasartut naluneqanngillat. Qanganisarujussuarnillu nassaassaqarfiit nunarsuatsinni inuit tamatta kingornussatsitut isigisariaqarpavut, sulilu ukiorpassuarni paasisassarsiorfigineqartarnissaat qularnanngilaq. Isuanili paasisassarsiorfigineqartartussat annikitsunnguamiimmata eqqaanni aatsitassarsiortoqarnissaa ajoqutaanavianngilaq, Minik Rosing naggasiivoq.