Qaqqat Alanngui nutaamik naaneqalerpoq

Kalaallit filmiliaat Qaqqat Alanngui nunatsinni pisiniarfinni tallimanngorneq novembarip 16-iani pisiarineqarsinnaalissaaq. Pilersaarutit malillugit Kalaallit Nunaanni dvd-erniarfinni tamangajanni filmi pisiarineqarsinnaassasoq, filmimik suliarinnittut Tumit Production ilisimatitsipput.

Filmip saniatigut immiussat allat akunneq ataaseq sivisussuseqartut  blu-ray-ip imarissavai, dvd-ertaani filmip saniatigut aamma immikkut immiussat 20 minutsinik sivisussuseqartut ilaapput. Saqqummersitani filmip sanitigut immikkut immiussani kalaallisut oqaasertaqassapput, ataatigut allagartalersugaanatik. Blu-ray-ertaani filmip naanera allaanerusoq aamma isiginnaarneqarsinnaassaaq,

- Taamanikkut oqaluttuaq sanagatsigu allamik naaneqaraluarami, filmiliarineratali nalaani isumassarseriasaaratta naanermik allamik. Nalunartut pillugit naanerit tamaasa filmiliariinnarpagut, taama Qaqqat Alanngui-ni ilitsersuisoq Malik Kleist oqarpoq. 

Qaqqat Alanngui dvd-tut blu-ray-itullu saqqummersinneqarnerani immikkut immiussat ilaatinneqartut tassaapput filmimi isiginnaartitseqataasut immiussinermi misigisaminnik oqaluttuarnerat. Qaqqat Alanngui sananeqarnerani pisimasut misigisallu Malik Kleist-ip aamma oqaluttuarissavai.

Tumit Production-imiit massakkut oqaatigerusunngikkallarpaat dvd-t blu-ray-illu qanoq amerlatigisut naqitertinneqarsimanersut.  

- Naatsorsuutigaarput kikkut tamarmik pisinnaassasut, taamaanngippat amerlanerusunik naqiterteqqikkumaarpugut, Malik Kleist oqarpoq.  

Qaqqat Alanngui filmitaata isiginnaarnerani danskisut tuluttullu ataatigut allagartalerlugu isiginnaarneqarsinnaassaaq.