Qaqqat Alanngui Nanookikkullu Go' morgen Danmark-imi

Ullaaq maanna danskinik eqeersaapput filmimik Qaqqat Alanngui-mik filmiliortut, taakku TV2-mi aallakaatinneqartartumi, Go' morgen Danmarkimi apersorneqarllutik.

Apersuineq qulequtserneqarsimavoq, "Kalaallit ersinartumik filmiliaata rekordiliinerit tamaasa qaangerpai". Apersorneqartut tassaapput ilitsersuisoq Malik Kleist, produceri Aka Hansen aamma isiginnaartitsisartoq Angajo Lennert-Sandgreen.

Apersorneqartut sammivaat ilumut Nunatsinni qivittoqarnersoq, ippernat immiussinerup nalaani paamisaarineri aammalu Nunatsinni filmiliortartut amerligaluttinnarneri.

- Filmiliarput qaammatini marlussunni ingerlareerpoq. Maannalu takussaalereerput aningaasarpassuit atornagit akikitsunik filmiliortartut. Kalaallit Nunaanni filmiliortarneq ingerlallualerpoq, Malik Kleist oqarpoq.

Go' morgen Danmarkimi ataasinngorpat aallakaatitsinermi sammineqassapput nipilersortartut Nanook. Aallakaatitap ingerlanerani Nanook nipilersussapput.

- Aallakaatitassiami taama angitigisumi kalaallit nipilersortartut tusarnaartitsinissaat tulluusimaarutigaara, Frederik Elsner sermitsiaq.ag-mut oqarpoq.

Nanookkikkut nipilersornissaagaluat, Skarvenimi sapaatiuppat pisussat taamaatiinnarneqarpoq.