Qaqqasiortoq Rigshospitaliliaanneqarpoq
- Angut Sermitsiami ujaqqanik nakkakaaffigineqarsimasoq nalunaarfigineqarpugut. Taava qatserisartut suleqatigalugit Sermitsialiarpugut, tassanilu angut takuarput ujaqqanik qallerneqarsimasoq. Taanna ikiorserneqarpoq peerneqarluni napparsimmavimmullu apuunneqarluni, Nuummi Politiineersoq, Kasper Berthelsen, oqaluttuarpoq.
Aqqut, angutip 53-inik ukiullip atugaa uloriarnarsimangikkaluarpoq, ujaqqamilli kusanartumik tiguseriarnermini ajutoorpoq.
- Ujaqqamik kusanartumik tigusiniartillugu ujaqqat angisuut nakkakaalersimapput, angullu qallerneqarluni, Kasper Berthelsen oqarpoq.
Taassuma ilanngullugu ilisimatitsissutigaa, angut qiteralimmigut, nissumigut siffissamigullu arlalinni napisimasoq ajunngitsoq.