Qaqqasiortartut inuunerminnik navianartorsiortut

Arfininngormat pisoq Nick Nielsenip ima oqaluttuaraa:

- Assut sakkortuumik atugaqarpugut, tupeqarfik siulleq 6.100 meterimiittoq ornillugu massakkut basecampimut (tupeqarfimmut, aaqq.) uternikuuvugut. Ajunaangajalluinnarpugut, immaqa taama oqartoqarsinnaavoq. Aallaqqaammut tappikunga ingerlaarlunga ujaqqat nakkaagamik taavalu tungitsinnut sisoorlutik, Nick Nielsen oqarpoq.

Qaqqasioqataa Jacob Witche siulluisoq ujaqqat sanioqquavaat allallu tungaannaannut aallarsimallutik.

- Sangusaqattaartorsuullutik ujaqqaat taakku pisut, ujarangaatsiaq qanillivittoq pissikkama ajaappiara toqqivaa, qujanartumik uanga toqqitinnanga, oqaluttuarpoq.

Qaqqasioqatigiit annakkuummertorujussuullutik sivingasorujussuaq taanna tappavungarsuaq apummik sermimillu atanilik ingerlaarfigeqqilerpaat, sunaaffa pissaq aggersoq.

- Ingerlaarniaasaarluta Jaaku nipipalaamik nillerpoq. Qummut qiviarlunga tassa aamma apussuaq tungitsinnut sisulluni aallarsimasoq. Aamma qaqqap tungaanut allunaasamik pitoqqagatta pissippugut taakunga qaqqap tungaanut. Qujanartumik aputip sisoortorsuup saneqqutilaarpaatigut. Suna tamarmi nipersuaq, sajulaarsuaq, tassami aput oqimaatsorsuugami massakkut kiatteqattaalermat, nassuiaavoq.

- Assorujussuaq tupappugut, annaffissioqqaariarlutalu tamaani innaannarsuarmi maani ikerinnarmi nerivugut, taamaaleriarluta qummut aallaqqippugut, 6.100 meterimi tupeqarfitsinnukarluta.

Tuperfeqarfik piareereerpoq, qasuallaaqigamilli tupersuaqarfimmut ulloq taanna uterput. Silali maannamut unerisimasimanngilaq.

- Kisianni assorujussuaq eqqarsarnartoqarpoq qummut ingerlaqqinnissarput. Ujaqqat nakkakaaginnaavikkamik apullu sisooqattaarluni ulorianarpoq majuarfigisarput, oqarpoq.

Tupeqarfiit pingasut qaqqarsuup qaavata tungaanukarnermi suliarineqartussaapput. Taamaammat qaqugu qaqinissaa eqqarsaatigiinnarlugu ungasinnerarpaa.

- Artornartorujussuussaaq uatsinnut aamma tappavani qutsissumi suli sininnikuunnginnatta. Naammassippata aatsaat qaqqarsuaq qaqiniarlugu aallartissinnaavarput. Taamaattumik qaqiniassagutta aatsaat 20-ata kingorna naatsorsuutigisinnaavarput, Nick Nielsen oqarpoq.

Nick Nielsenip Jacob Witche-llu nunami allamiut tupersimaaqatigaat, assullu qummut ingerlaqqinnginnerminni ilaqutariissuartut inuunertik nuannarinerarpaat. Russit pølseliaat Italiamiullu qaluniliaat mamarsaatigisartakkanut ilaanerarpaat.

Qaqqasiortartut nunatsinnut aggustip ulluisa tallimaani aallarnissartik naatsorsuutigaat.