Qaqqasiortartoq Qaasuitsumi pisortanngorpoq
Nick Nielsen 2005-imi diplomingeniørinngorpoq taamanimiillu Danmarkimi ingeniøritut siunnersuisarfittut suliffeqarfiit marluk suliffigisimallugit. Nick Nielsen saniatigut ilinniakkaminut qaffassarluni Danmarks Tekniske Universitetimi civilingeniøritut ilinniagaqarpoq.
Nick Nielsen sunngiffimmini qaqqasiortartuuvoq ilisarisimaneqarluartoq, nunarsuarmilu qaqqat portunersaat, Mount Everest, qaqinikuullugu. Qaqqasiornermi saniatigut ilisimasassarsiornerni arlalinni aquttuunikuuvoq, ilaatigut sermersuarmik sisoraaserluni itiviinermut.
Pisortartaap pitsaanngorsaavigerusutai tassaapput avatangiisinut tunngassuteqartut.
- Kalaallit Nunaanni ukiut 50-it kingulliit ineriartorneq annertusimaqaaq. Ilinniarfiit annertuut pigilersimavagut, napparsimaveerannguaniik, nappersimavissuarnut nutaaliaalluinnartunik peqalersimavugut. Avatangiisilli qiviarutsigit tassani ineriartortoqarsimanngilaq. Tassani puiguisoqarsimavoq, Nick Nielsen qaasuitsup.gl-imut oqarpoq.
Pissortartaaq aamma Angallannermut Ataatsimiittitaliami ilaasortaavoq. Ataatsimiititaliaq Kalaallit Nunaanni siunissami aaqqissuussaanerup isikkussaa pillugu oqallisissianik saqqummiussaqartussaavoq.
