Qaqqasiortartoq folketingimut piukkuppoq
Qaqqasiortartoq tusaamasaq aamma Qaasuitsup Kommuneani Sanaartornermut Avatangiisinullu pisortanngorlaaq, Nick Nielsen Folketingimut qinigassanngortippoq.
Allattoq Apollo Jeremiassen
januaarip 26-at 2011 08:45
Nick Nielsen 35-nik ukiulik politikki eqqarsaatigalugu nutaraasoq Siumut sinnerlugu qinigassanngortittoq, aviisi Atuagagdliutit allaaserinnippoq.
Aviisimulli oqaaseqarnianngikkallarpoq.
Akitsinnguaq Olsen, Vittus Qujaukitsoq aamma Doris Jakobsen, aamma Siumut sinnerlugu Folketingimut qinigassanngortipput.
Siumup qinigassanngortitai ataasinngorpat januaarip 31-ani tamanut ilisaritinneqassasut, Siumup siulittaasua Aleqa Hammond oqarpoq.
