Qaqqarsuavut uumasullu assigiinngitsut aningaasassatsinni

Qaqqat oqaluttuatoqaatitta titartagartaannik ilallit aningaasassatsinni assitaliunneqassapput – Naja Abelsen taakkunannga titartaasuussasoq naalakkersuisut aalajangeqqammerpaat.

Nunatta qaqqai aalajangersimasut tallimat, qaqqallu taakku immikkut oqaluttuassartai, Naja Abelsenip aningaasat saqqaanni titartassavai.

- Qaqqat tallimat pineqartut tassaapput Upernaviup eqqaani Kullorsuaq, Uummannap Qaqqaa, Nuup kangerluaniittoq Pisissarfik, kujataani Killavaat kiisalu Tasiilap akianiittoq qaqqarsuaq inngigissoq, Namminersornerullutik Oqartussani pisortaaneq, Kaj Kleist, oqarpoq.

Aningaasat pappiaraasut mumingani nunatsinni uumasut titartagartaliunneqassapput – soorlu qilalukkat qernertat umimmaallu.

Aningaasat qaamanermut talliukkaanni takuneqarsinnaasussaq, nanoq, Naja Abelsenip aamma titartassavaa.

Nunatsinni aningaasassavut pillugit suleqatigiissitat, Naja Abelsen peqatigalugu, sapaatip-akunnerani tullermi Danmarkiliassapput, Naalagaaffiup aningaaserivissuani sulisut pilersaarusioqatigiartorlugit.