Qaqqap sivingarnanut assit seqersitat
Eqqumiitsuliortummi seqersaataat atorlugit innuttaasut namminneerlutik Juuliap qaqqaani eqqumiitsuliorsinnaassasut Qaasuitsup Kommuniata nalunaarutigaa.
Suliniut Ilulissat katersugaasiviata siornatigut misilereerpaa, eqqumiitsuliortoqatigiillu Tura Ya Moya-kkut siorna suliaat NIPI & QAAMASOQ SAGA ukioq manna atoqqinneqassaaq, tamatumuunalu Juuliap qaqqaa kaperlaap ataani seqersartut atorlugit eqqumiitsuliorfiussalluni.
Seqersaatinik assilialiat atorneqartussat Julia Pars-ip, Mia Lindemann-ip kiisalu Reykjavik-imi Barnalied Myndisskulin-imi atuartut suliarisimagaat nalunaarutigineqarpoq.
- Ilulissat katersugaasiviani seqersaatit atorlugit eqqumiitsuliaq, nunani avannarlerni eqqumiitsuliortunik paarlatseqatigiittarnermi aallaaviusassanera eqqarsaatersuutigineqarpoq. Ilulissanimi katersugaasiviup qanga pisimasuinnaat piunnaarlugit ullutsinni pissutsit aallaavigalugit innuttaasut namminneq iliuuseqarsinnaanngornissaannik soqutiginnilersinniarsaritinneqarnissaat eqqarsaataavoq, Michael Nielsen oqarpoq.
Seqersitanik suliniut ammarnersiorlugu qallunaaq nipilersortartoq Karen Thastum kiisalu tivasartoq tunumiu Silbat Kuitse aliikkusersuiumaarput, taakkulu qilaat qallortaallu klarinet atorlugit nipilersukkanik eqqissisimanartunik appisimaartussaassalutik.
Ilulissani eqqumiitsuliaq naliginnaanngitsoq saqqummersinneqareermat Islandimut ingerlateqqinnissaa pilersaarutaavoq.
