VIDEO Qaqortumi tillinniariaraluartoq imminut nalunaarutigivoq

Ataasinngornerup marlunngornerullu unnuaani Qaqortumi, siullermik Kommunip allaffianut kingornatigullu Grønlandsbankimut tillinniaraluartoq, angut 20-t sinnerlugit ukioqartoq nammineerluni ippassaq ullaakkut Qaqortumi Politiinut nalunaarutigivoq.
Allattoq Jørgen Semionsen
decembarip 18-at 2014 16:01

- Kommunimiissimariarluni kingusinnerulaartukkut bankimiissimavoq, Region Kujallermi Politiini pisortaagallartoq, Sivalerak Terkilsen, KNR-imut oqarpoq.

 

Tillinniariaraluartorli angut 20-t sinnerlugit ukioqartoq ippassaq ullaakkut nammineerluni politeeqarfimmukarsimavoq.

 

- Tassa ullaaq saaffiginnippoq angut nammineerluni nalunarutiginnittoq. Nammineq oqarneratuut imigassartorsimavoq unnuaq taanna, unnuakkut silaqarsimannginnerarpoq, Sivalerak Terkilsen KNR-imut oqarpoq.

 

Tillitaqarnanilu tillinniariaraluartoq pillugu tusagassiutit atorlugit politiit takunnissimasinnaasunut ikioqqullutik saaffiginnissuteqarmata, angut nammineq taamaaliorsimalluni pasitsaatilersimanerarsimavoq.

 

- Saaffiginnissuterput, imminut ilisarisimagami, taamatut oqarneratuut, taava taamaasilluni saaffiginnippoq. Region Kujallermi pisortaagallartoq KNR-imut oqarpoq.

 

Iluatitsinanilu tillinniaraluartoq qanoq pineqaatissinneqarsinnaanersoq politiinit nalilersorneqartussaavoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq