Qaqortumi Sømandshjemmip pilersaaruterujussuani unitsittariaqaralerunarpaa

Qaqortumi Sømandshjemme siorna nunaminertamik 350 kvadrat meteritut annertugisumik qinnuteqarpoq, innarluutilinnut naleqqussakkanut ineeqaanut ataatsimiittarfissuarmillu alliliinermi sanaartortitsiniaramik.

Sømandshjemme ilutitsivoq akuerineqarami, kisianni sapaatit akunneri pingasut qaangiummata Narsarsuaq matuvoq aatsaallu Kangerlussuaq aqqusaaqqaarlugu kujammukartoqarsinnaalerpoq.

2009-p naajartornerani Danmarkimiit tikittut inisimasorisartakkavut malunnaatilissuarmik ikilerukussuarput, taama oqaluttuarpoq Qaqortumi Sømandshjemmep pisortaa Janne Dalsgaard nangipporlu, tikittussaagaluarlutik taamaatitsiinnartut tassaapput takornariat aammalu suliffitsik aqqutigalugu angalasussaagaluit. Taama pisoqarmat sanaartortinniagarput annertooq ilumut qulanngivilluta aallatissanerlutigut nangaassutigilerparput.

Janne Dalsgaard-ip aamma oqaatigaa Kangerlussuakkooqqaarluni kujammukarnissaq ungasigineqalersimasoq qularutissaanngitsoq.

Siornatigut Narsarsuarmut toqqaannartoqartarnerata takutissimavaa takornariat, suliffitsik aqqutigalugu angalasut juullisioriallu imaaginnavissimasut, taamatulli angalasartut decemberimi 2009-mi angalanissaagaluatik amerlasoorpassuit tamaatiinnartarsimagaat erseqqissarpaa.

Sanaartortinniagarput eqqarsaatigalugu aaliangerpugut qaammatimi pingasuni aliangertinnata utaqqeqqaarniarluta, ilami aningaasarpaassuit uani atorneqartussaammata, Janne Dalsgaard naggasiivoq.

Tamanna Kommune Kujallermi borgmesterimut, Simon Simonsenimut oqaaseqarfigitipparput, taanna ima oqarpoq:

- Inuiaqatigiit akileeqataasariaqarput ineriartornerup ingerlatiinnarneqarnissaata ukiut tulliuttut pingasut/sisamat ingerlaneranni aningaasaleeqataanissaannut. Tassani 10-12 millionit koruunit taakkartorneqarput, Air Greenlandimut toqqaannartumik attaveqartitsinissamut ukiumut aningaasaliissutigineqartassasut.

Mittarfiit Upernavikkut, Uummannakkut, Paamiukkut allallu eqqarsaatigalugit Kujataaninngaanniit aningaasalersueqataanikuuvugut, aamma taamaalilluta ukiut pingasut/sisamat tulliuttut eqqarsaatigalugit utertitsivigineqarsinnaasariaqaraluarpugut, Simon Simonsen oqarpoq.

Taanna aperaarput periusissaa massakkut sunaassanersoq, akivorlu:

- Atorfilittakka ullaaq oqarfigaakka, angallanneq pillugu naalakkersuisumut saaffiginnissutissavut suliarineqassasut, ersarissut marluupput, tassa Narsarsuup ukiukkut ingerlaannarnissaa, taavalu Nunatta kujaterpiaani imaatigut angallatiliinissap qulakkeerneqarnissaa.