Qaqortumi suliffissaaleqisut ikiorserniarneqalerput
Qaqortumi suliffissaaleqisut amerliartupiloornerat ikiorsiiffiginiarlugu Namminersornerullutik Oqartussat Qaqortullu kommunea suleqatigiilerput.
Suliffissanik nutaanik pilersitsinissaq anguniarlugu suleqatigiissitamik pilersitsisoqassasoq naalakkersuisut Qaqortullu Kommuniata isumaqatigiissutigeqqammerpaat, anguniarneqassaarlu piffissami aggersumi suliffissaaleqinerup annikillisarnissaa siunertaralugu suleqatigiinnissaq.
Ukiuni kingullerni Qaqortup kommuneata suliffissat 60-it sinnerlugit annaasimavai. Suliffiit tamakku illoqarfinnut allanut nussorneqarsimapput.Tamanna kinguneqarpoq ilinniarsimanngitsut allaffimmiutullu ilinniagallit 250-it missaanniittut suliffissaarunnerannik, taamalu kommunip ikiorsiissutinik tunniussisarnera annertuseriarujussuarsimalluni.
Suleqatigiissitaq decembarip aallartilaarnerani perngaammik ataatsimiissaaq.
- Suliffinnik ataavartunik pilersitsiniarnissaq oqaluuserineqassaaq. Qaqortup kommunia suliffissaaleqisunut pikkorissartitsinernik ingerlataqareeraluarpoq, kisianni ilinniarsimanngitsunut allaffimmiunullu ilinniarsimasunut suliffissaqanngitsunut pikkorissartitsinissat qanoq sutigullu ingerlanneqarnissaat suleqatigiissitap aamma misissussavaa, Qaqortup borgmesteria Tommy Marø nassuiaavoq.
Ilinniarsimanngitsunut suliffinnik ataavartunik pilersitsinissaq anguniagassani pingaarnerpaatinneqarpoq, taakkuummata suliffissamik pissarsiniartarnermikkut ajornakusoortitsinerpaasartut, Tommy Marø oqarpoq.
