Qaqortumi Nanortalimmilu meeqqerivinnut akiliutit appassapput
Narsami meeqqerivimmiittuutillit akiliutaat annikitsumik qaffaavigineqartussanngorput, Qaqortormiut Nanortalimmiullu malunnaatilimmik appaaffigineqartussanngorlutik, Kommune Kujallermi
Borgmesterinngortussaq, Siumumeersoq, Simon Simonsen, oqarpoq.
- Narsami qaffaasoqalaartussaavoq, isertitaqqortunerpaat qaammammut 300 koruuni tikillugu qaffaaffigineqartussaapput, isertitakinnerusut 131 koruuni tikillugu qaffaaffigineqartussaallutik, Simon Simonsen nassuiaavoq.
Nanortalimmi Qaqrotumilu akitigut appaanerit malunnarnerussasut aamma oqaatigaa.
- Kommune Kujallermi akissaatikinnerpaat meeqqerivinnut akikinnerpaamik 270 koruuneertassapput, akunnattumik isertitallit 540 koruuneertassallutik akissarsiaqqortunerpaallu 2.106 koruuneertassapput, oqarpoq.
Aningaasat meeqqerivinni akiliinikinnerulissutissat, akileraarutinit aaneqassaaq, missingersuusiornermilu sapinngisamik inunnik isumaginninnermut eqquissanngitsoq sulissutigineqarsimalluni.