Qaqortumi mittarfissap tungaanut aqqusinissaq aallartinneqarpoq
Kommune Kujallermi borgmesterip Jørgen Wæver Johansenip, aqquserniorfigineqartussap suliaralugu aallartinneqarnerani nivariaqqaartoqarnissaa pillugu kommunalbestyrelsimi partiit sinniisui qaaqquai, tassaappullu kommunalbestyrelsimi ilaasortat Simon Simonsen, Siumut, aamma Kelly Berthelsenilu, Inuit Ataqatigiit.
Taakku taamaalillutik nivariarnermi siullermi aamma peqataapput. Naalakkersuisut siulittaasorigallagaat Kim Kielsen nivariaqqaarnermi aamma peqataavoq:
- Mittarfissaq uagutsinnut kujataamiunut pingaaruteqarluinnartuuvoq, siunissarlu eqqarsaatigalugu isumalluarneroqqilernissamut toqqammavissat pingaaruteqarluinnartut taanna ilagisussaavaat, Kommune Kujallermi borgmesteri, Jørgen Wæver Johansen oqalugiarnermini ilaatigut oqarpoq.
Aqquserniassap teknikkikkut suliassartaa pissanganartoq, Jørgen Wæver Johansenip oqaatigaa, Qaqortoq Entreprenør Forretningimullu saaffiginninnermini ilaatigut oqaatigalugu aqquserniassap kusanarlunilu isumannaatsuunissaa neriuutigalugu, soorlu aamma piffissaq eqqorlugu naammassineqarnissaa neriuutigigini.
Tassa imaappoq, naak Qaqortumi mittarfiliornissamut pilersaarutit Inatsisartuni inaarutaasumik suli akuersissutigineqanngikkaluartut, Qaqortumi mittarfiliorniarneq 2018-imi naammassineqarumaartoq Jørgen Wæver Johansenip neriuutigaa.
