Qaqortumi mittarfiliornissaq suli mattunneqavinngilaq
Naak nalunaarusiami allaaserineqaraluartoq, Kujataani timmisartunut suluusalinnut mittarfiliornissaq imminut akilersinnaanngitsoq, taamaattoq aningaasaqarnermut Naalakkersuisup, Andreas Uldumip tamanna massakkuugallartoq mattutivinngilaa.
- Nalunaarusiaq soqutiginarpoq kisianni nalunaarusiaq maanna nalilersussallugu tunngavissaqanngikkallarpunga, tassa Kujataani pilersaarut tamarmiusoq aatsaat takoqqaarlugu aalajangiinissaq pisussaammat. Mittarfiit arfinillit misissorneqartussaapput taamaammat mittarfiit pillugit pilersaarut, Attaveqarnermut Naalakkersuisup, Knud Kristiansenip saqqummiussassaa utaqqimaarusppara immikkut tamanna oqaaseqarfiginninnarani.
Andreas Uldumip Kujataani attaveqaatit allanngortinneqarnissaat pillugit nalunaarusiaq atuareerlugulu taama oqarpoq. Uldumilli naqissuserpaa, nalunaarusiap immikkuualuttortai suli iluamik iserfiginnginnamigit nalunaarusiap uppernassusaa maanna oqaaseqarfigisinnaanagu.
- Tassa suliaq tamarmiusoq takusimanagu ajornakusoorpoq nalunaarusiami ataasiakkaat oqaaseqarfigissallugit, taammaattorli nalunaarusiaq sunniuteqaqataasinnaassasoq oqaatigisariaqarpoq, kisianni assiliaq tamarmiusoq takusimanagu immikkuualuttut ataasiakkaat oqaaseqarfiginissaat tunuarsimaarfigigallassavara, Aningaasaqarnermut Naalakkersuisoq, Andreas Uldum taama oqarpoq.
