Qaqortumi mittarfiliornissamut suliassat ingerlanissaannut pilersaarut piareerpoq
Qaqortumi mittarfiliornissaq inuiaqatigiit aningaasaqarnerat tunngavigalugu pissarsiviussasoq, Assartuussineq pillugu Isumalioqatigiissitaq nalunaarusiamini inerniliivoq, Inatsisartunili inaarutaasumik aalajangiisoqannginnerani Inatsisartuni ilaasortat sapinngisamik pitsaanerpaamik aalajangiinissamut tunngavissaqarnissaat naalakkersuisut kissaatigaat
-Kalaallit Nunaata kujataani ineriartorneq pingaartittorujussuuara, tassanilu attaveqaatit tamarmiusut pingaaruteqartorujussuarmik inissisimapput. Tamanna tunngavigalugu suliat ingerlanissaannut pilersaarutip akuerineqarnera nuannaarutigaara, misissueqqissaarnerit naammassineqarsinnaalissammata. Kalaallit Nunaata kujataani innuttaasut siunissami angallannikkut pissutsit atugassatik pillugit nalornissuteqartariaqanngillat, Ineqarnermut, Attaveqarnermut Angallannermullu Naalakkersuisoq Jens B. Frederiksen oqarpoq, taassumalu naatsorsuutigaa, kingusinnerpaamik 2014-imi Qaqortumi mittarfissamut siunnersuut suliarilluagaq Inatsisartunut saqqummiussinnaassallugu.
Tamannali pitinnagu, siunissami aaqqissuussinerup sapinngisamik eqaannerpaajunissaa qulakkeerniarlugu sumiiffimmi pissutsinik sukumiisumik misissuisoqaqqaassaaq. Sanaartornerup nalinginnaasumik ingerlanneqarnissaanut pilersaarusiortoqassaaq, tannalu suliassap ingerlatsinikkut qanoq ataqatigiissinnaaneranik takutitsissaaq.
Misissueqqissaarneq tamarmiusoq Kommune Kujalleq suleqatigalugu ingerlanneqassaaq. Misissueqqissaarneq tunngavigalugu Qaqortumi mittarfiliortoqassasoq Inatsisartuni amerlanerussuteqartut aalajangiissappata, pilersaarusiorneq sanaartornerlu 2015-imi aallartissinnaassaaq. Tamatuma kingorna mittarfik ingerlalernissaminut kingusinnerpaamik 2018-imi piariissaaq.
Qaqortumi mittarfiliornissamut aalajangiinissap tungaanut suliat ingerlanneqarnissaannut pilersaarut Naalakkersuisut januaarip ulluisa 17-anni ataatsimiinnerminni akueraat.
