Qaqortumi innuttaasut tb-mut misissorneqarput

Umiarsuaaqqap qinnguartaammik usisup Kujataani nunaqarfinnut tamanut angalareernerani innuttaasut 69 procentii sakialluummik TB-mik tunillatsissimasinnaanerminnik misissortipput, maannalu Kujataani illoqarfinni misissuinissaq tullinnguuppoq.
Allattoq Jaaku Lyberth
oktobarip 03-at 2010 13:00

Qaqortumi innuttaasut 15-ileereersimasut aqagumiit oktobarip ulluisa sisamaanniit qinnguartartinnikkut/seqersartinnikkut TB-mut misissortikkiartoqquneqarput.

Ulluinnarni nalunaaqutaq ataatsip kingorna napparsimmaviliarnikkut misissortittoqarsinnaavoq, Qaqortumilu misissuinerit oktobarip ulluisa 23-ata tungaanut pissaaq.

Napparsimasutut misigisimanngikkaluaraanniluunniit napparsimmaviliarluni misissortinnissaq pingaaruteqartoq, Nunatsinni Nakorsaaneq erseqqissaavoq.

Naartuguilli qinnguartartissinnaassanngilatit, aamma 15-iliisimanngikkuit. Meeqqat atuarfianni klassini aalajangersimasuni atuartut aaversinnikkut misissortissapput, atuarfimmiillu aggersarneqassallutik. Meeqqat mikinerit pisariaqartitsineq naapertorlugu misissorneqassapput.

Nappaat sakialluut akiorniarlugu maannamut iliuusaasarsimasut naammaginannginnerat iliuuserisamut matumunnga pissutaavoq.

Sakialluummik Kalaallit Nunatsinni nappaateqalersartut ukiuni kingullerni tallimani ukiumut 71-iupput, Kalaallit Nunaat nunat ineriartorfiusut arlallit akornannut taamaalilluni inissilluni.

Naalakkersuisut 2007-imi ukiakkut ataatsimiinnerminni sakialluummut misissuinissamut immikkut aningaasaliipput.

Narsaq Nanortalillu qaammatip ingerlanerani misissuivigineqassapput.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq