Qaqortumi imermik pinnguarfissuarmik sanasoqassaaq

Qaqortumi tasersuaq imermik pinnguarfissuarmik unammillerteqaliliivippoq. Tassami naluttarfissarsuarmik titartaasartut akornanni ajugaasoq Illu Atlantikumi Københavnimiittumi ullumi toqqarneqarpoq. Kulturikkut illorsuaq Tasersuup killingani naluttarfittaqaannarani, aammali timersortarfeqarlunilu isiginnaartitsisarfittaqartussaq, pillugu borgmester Simon Simonsen ima oqarpoq:
septembarip 29-at 2008 11:47

-Qaqortumi timersortarfitta aserfallannikuusup nutarternissaa eqqarsaatigileratsigu maanna tassa nutarterlugu ilaqqillugulu suliarinissaa piffissanngorsimavoq. Timersortarfitoqaq kulturimut illorsuartalerlugulu naluttarfittalissaaq, taamaalilluni ullutsinni pisariaqartitaasut ineriartortinneqassammata, Simon Simonsen Københavnimi oqarpoq.

Illussanik titartaasoq kommunalbestyrelsep piumasaanik amerlanerpaartaanik tunniussaqartuusoq aamma borgmesterip oqaatigaa.

- Timersortarfiinnaanani isiginnaartarfeqassaaq. Aamma naluttarfik Qaqortumi meeqqanit inuututtunillu ukiorpassuarni kissaataasoq ilorsuartaamiissaaq, erseqqissaavoq.

Qaqortoq illoqarfittut kulturikkut eqeersimaarfittut siunissami taaneqartuartariaqarsoraa, pingaartumik ilinniartoqarfiunera eqqarsaatigalugu.

- Aamma meeqqanut inuusuttunullu periarfissagissaartariaqarami.

Qaqortup borgmesteria Simon Simonsen taama oqarpoq.

Illussanik titartaasut, BBP Arkitekter, Københavnimeersut, ingeniørit siunnersuisarfiat Sanati siunnersuisartullu Cowi-kkut Qaqortup Kommunianeersut danskit aningaasaateqarfiinut qinnuteqarnitik aallartereerpaat. Qaqortumi kulturip illutaassaa 100 millioni koruuninik akeqassangatinneqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq