Qaqortumi atsioqatigiittoqassaaq

Kalaallit Nunaata Kujataata imartaani uuliaqarneranik gasseqarneranillu misissuinissamut, nassaartoqassappallu qalluinissamut isumaqatigiissutissaq, Qaqortumi kommunalbestyrelsip ataatsimiitarfiani aqagu atsioqatigiissutigineqassaaq.
januaarip 08-at 2008 15:52

Uuliamik gassimillu misissuinissamut Tuluit uuliasiortitseqatigiiffiat Skotlandimi Edinburgimi angerlarsimaffilik Cairn Energy PLC, nunatta kujataata imartaani sumiiffinni marlunni uuliamik gas-imillu ujaasinissamik qalluinissamillu qinnuteqaammik siorna oktobarip aallaqqaataani Namminersornerullutik Oqartussanut tunniussaqarsimavoq.

Tamatumalu akuerineqarnissaa Qaqortumi aqagu atsioqatigiissutigineqarniarpoq, ilanngullugu Qeqertarsuup kitaani uuliaqarneranik misissuinissamut akuersissut aamma atsioqatigiissutigineqassalluni.

Ilasseqatigiinnertalimmik atsioqatigiittussat tassaapput Ineqarnermut, Attaveqarnermut Ikummatissanullu naalakkersuisoq Kim Kielsen, illuatungaanilu uuliaqarneranik gasseqarneranillu misissuinissamik, nassaarunillu qalluinissamik qinnuteqaateqarsimasut Tuluit uuliasiortitseqatigiiffiat Cairn Energy PLC, tassanilu Nuna Oil aamma suleqatigineqartussaavoq.

Kalaallit Nunaata Kujataata avataani sumiiffik misissuiffigineqartussaq avannarpasissutsip 60 aamma 63 gradimi inissisimavoq.

Kujataata kitaani uuliaqarneranik gasseqarneranillu misissuinissat pillugit Namminersornerullutik Oqartussat tusagassiiviata Qaqortup katersortarfiani aqagu unnukkut arfineq marlunut paasititsiniaanissaa ilanngullugu pilersaarutigineqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq