Qaqortukulooq kulturikkut kingornussat allattorsimaffiannut ilanngunneqartussatut siunnersuutigineqarpoq

Illuliassanik sanaartornermut imaluunniit pinngortitamut tunngatillugu sanaartornermut tunngassuteqartunik siunnersuutissaqaruit taamalu tamanna UNESCO-mi tassa Naalagaaffiit Peqatigiit ilinniartitaanermut, ilisimatusarnermut kulturimullu Suleqatigiiffiata, iluani kulturikkut kingornussat allattorsimaffiannut pilerigineqartaqisumullu ilanngutikkusukkukku, taava siunnersuutigerusutatit decembarip aallaqqaataatinnagu Danmarkimut Kulturarvsstyrelsemut nassiussinnaagitit, aviisi Politiken allaaserinnippoq.
Allattoq Louise M. Kleemann
oktobarip 16-at 2008 14:23

Nunarsuarmi sumiiffiit assigiinngitsut 878-it UNESCO-mi massakkorpiaq taamatut kulturikkut eriagisassatut allattorsimasuutigineqarput – taakkulu ilagaat Ilulissat eqqaaniittoq Kangia.

Sanaartugaq, eqqaassutissiaq, nuna kulturikkut eriagisaq imaluunniit pinngortitaq taamatut eriagisatut allattorsimaffimmut ilanngutsinneqarsinnaasarput.

Maannalu tassa nutaamik taamatut siunnersuuteqartitsisoqartussanngormat Kulturarvsstyrelse tamanut siunnersuuteqaqqusilluni kajumissaarivoq.

Oqaatigineqarpoq siunnersuutit Danmarkimeersut arfinillit maannamut takkutereersimasut, taakkunanngalu arlallit nunatsinneersuupput, tassaallutik kujataaniittoq Qaqortukulooq kiisalu kujataaniittut qallunaatsiaat illukoqarfii, taavalu aasiviusarsimasut Aasivissuit aammalu Kangerlussuup eqqaaniittoq Arnangarnup qoorua.

Allanik piukkussinnaasannik isumassarsiassaqaruit taava kulturarvsstyrelsemut decembarip aallaqqaataa nallertinnagu siunnersuutinnik nassiussisinnaavutit.

Nassiussiffissat tassaavoq: www.kulturarv.dk

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq