Qaqortoq nalliuttorsiorpoq - illoqarfik ineriartorfiulluarsimavoq
Qaqortoq ukiunik 250-inngortorsiorpoq. Illoqarfiup nalliuttorsiornera apriilip arfineq-aappaanni persuarsiornartumik nalliuttorsiutigineqarpoq. Pisut assigiinngitsut 84-inik ukiulimmit Kristina Thomsenimit malinnaaffigineqarput.
- Kommunip eqqaani erfalasulertoqarpoq, oqaluffitoqqamilu naalagiaqatigiittoqarluni, Kristina oqaluttuarpoq.
Illoqarfik ineriartortoq
84-inik ukiulik Kristina Thomsen - Qaqortumi 1940-50-ikkunni meeraasoq, Qaqortup ineriartortinneqarnera taamanili eqqaamalluarpaa, maannakkumut allaat:
- 1940-p naalivinnerani illoqarfik piorsarlugu aallartittoqarpoq, innuttaasut ikittunnguuvugut. Illuliortoqarpoq, aqqusernit amitsuaqqat suliarineqarput, taamaalilluni illoqarfik ineriartupiloorpoq. Taama ineriartortoqarnera nuannaarutigaara. Uagut meeraanitta nalaani illorsuit maanna takussaasut pigineqanngillat, massakkut sumi tamani illorpassuaqalernikuuvoq, oqarpoq.
Mittarfissuassaq neriulluarfigaa
Qaqortumi mittarfissuassaq Kristina Thomsenip neriulluarfigaa:
- Qujanaqaaq mittarfittaarniarmat. Ukiuni kingullerni kujataani angalaniarneq ilungersunartorujussuuvoq - sila sikorsuillu peqqutaallutik. Maani mittarfissaq atulerpat Narsarsuup tungaanut angalaniarneq kiisalu Kangerlussuakkoortarneq angallavigiunnaarutsigit iluaqutaassaqaaq, Kristina oqarpoq, imalu naggasiilluni:
- Imaallaat angumerissavarput, angumerissagutsigu! Qujanaqaaq allanngorneq aamma misigissagatsigu neriuppunga taamanikkussamut inuutitaassalluta, 84-inik ukiulik Kristina Thomsen oqarpoq.
Eqqaassutissamut qujanaq
Ullormi tassani pisut ilagaat ujaqqerisuusimasumut eqqaassutissap uleerneqarnera, tamanna Kristinap nuannaarutigaa.
- Hans Kielsen eqqaassutissaqalermat qamuuna assut tuppallerpunga. Ullormi nalliuttorsiorfimmi tuppallersimaarnermik misigisigivunga.
Eqqaassutissaq ujaqqerisumut Hans Kielsenimut tunngatinneqarpoq. Hans Kielsen “Hansersu” ujaqqerisoq angutaasimavoq sullarissoq. Suliaasalu annertuut ilagaat Qaqortumi kalaalimineerniarfiup eqqaaniit qummut kuuk sinerlugu ujaraannarnik sissiugaq kusanarluinnartoq.
Eqqaassutissaliinissamut ilaqutaasut sinnerlugit ernutaasup Ellen Simonsenip nammineq kajumissutsimik suliaqarluni aningaasaliisussarsiorsimasup suliniutigaa, taamaalilluni eqqaassutissaq Qaqortup illoqarfiata qeqqani takuneqarsinnaalerpoq.
