Qaqortoq: Angerlarsimaffimmut ujajaasut tigusarineqarput

Angutit inuusuttut sisamat aallaammik savinnillu sakkulerlutik sioorasaarillutik sapaatiummat unnukkut angerlarsimaffimmut ujajaapput. Angutit inuusuttut sisamat 19-inik, 18-inik 16-inillu ukioqartut politiit maanna tigusaraat. Aamma eqqartuussivimmut sassartinneqarput ullunilu 28-ini tigummigallagassanngortinneqarlutik.

- 16-inik ukiulik sapaatiummat unnukkut tigusaraarput. Ilisarisimasarereerparput pinerlunniaqatigisimasinnaasaanillu pasitsaassaqarluta, vicepolitikommisær Bent Ole Kleist Qaqortup politiivineersoq  KNR.gl-imut oqarpoq.

19-inik 18-inillu ukiullit politiit ataasinngormat unnukkut tigusaraat, 16-inillu ukiulik marlunngormat tigusaralugu.

- Ujajaasimanertik nassuerutigaat. Kommune Kujalleq suleqatigalugu 16-inik ukiullit inissiiffissaannik naleqquttunik maanna ujarlerpugut, Bent Ole Kleist oqarpoq.

Ujajaaneq sakkortooq Qaqortumi innuttaasut akornanni toqqissisimajunnaarsitsivoq. Politiilli maanna eqqissisaatigaat pinerluttut sisamaasut tigusarineqareersut pinerluttullu poliitinit ilisarisimaneqareersut.