Qaqorsaatit Nunatsinni tunisassiat nutaat
Kalaallit Nunaanni Brugseni suliffeqarfiup Inuit Youngip - Theodora Høeghimit Narsameersumit pigineqartup - qaqorsaasiaanik tuniniaanissamik isumaqatigiissuteqarsimavoq.
- Nunatta naasui atorpakka - soorlu siulivut aamma taamaaliortarsimasut - arlaleriarlungalu misileraatigisimallugit. Taamaalillungalu assersuutigalugu qajaasanik qaqorsaasiorniarlunga isumassarsivunga. Aammattaaq tupaarnanik kakillarnanillu qaqorsaasiussamaarpunga, Theodora Høegh oqaluttuarpoq.
Qaqorsaat timimut tamarmut atorneqarsinnaasoq tipigissaasersugaananilu akuutissalersugaanngilaq.
- Aamma qeqqussanik sermersuup eqqaani katersorsimasannik qaqorsaasiamik pissarsisoqarsinnavoq, aallartitaasoq oqaluttuarpoq.
Theodora Høeghip qaqorsaasiorneq angerlarsimaffimmini ingerlakkallarpaa, qaqorsaatillu qanoq piumaneqatiginersut apeqqutaatillugu tassani ingerlakkallassallugu.
- Qaqorsaasiakka soqutigineqaleraluttuinnarput, aamma sinerissami illoqarfinni arlalinni tuniniaagaalereerput, Theodora Høegh oqaluttuarpoq.