Qaqiffiup illutaa atorunnaarallarpoq
Pinngitsuuisinnaajunnaarsimasunut katsorsaavik, Qaqiffik, Nuummiittoq, hotel-imut utaqqiisaasumik aqagu nuunneqarallassaaq. Qaqiffiup illutaa, Dronning Ingrid-ip napparsimaviata akianiittoq, matuneqartariaqarsimavoq, anartarfimmut aqqutaa milittoorluni ajorsisimammat.
Katsorsaanerit inissiani Qaqiffimmut ungasinngitsumiittumi, Oasen-imi, utaqqiisaarutaasumik ulluni marlunni ingerlanneqarsimagaluarput. Oqaatigineqarpoq Qaqiffiup atoqqinneqarsinnaalernissaata tungaanut katsorsaanerit Hotel Nuummi ingerlanneqassasut.
- Qaammatit pingasut missaanni taamatut ingerlassagunarpugut, kuuffiup ingerlaarfiata aqqutaa aaqqinneqareerpat nutaanik aamma natersualersorneqartussaagami, Peqqissutsimut pisortaqarfimmi immikkoortortami pisortaq, Thomas Pedersen, taama oqarpoq.
Nutaamik Qaqiffiup illutassaanik sanasoqarnissaanut 5,3 millioni koruuninik tapiissuteqarniarlutik naalakkersuisut siusinnerusukkut oqarput. Tapiissuteqarniarnerlu pissusissamisut ingerlassappat siusinnerpaamik 2008-imi Qaqiffimmik nutaamik pilersitsisoqarsinnaassaaq.
