Isumaqatigiissutip atuutilerneratigut Frederiksberg Centret, Nuummi Ilulissani Qaqiffinnik piginnittoq, peqqinnissaqarfiup neqeroorutaanik ingerlatsiunnaassaaq. Katsorsaavik Nuuk imerajuttunik katsorsaasarnermik ingerlatsilerpat, katsorsaasarneq Nuummiinnaq ingerlanneqassanngilaq.
Namminersorlutik Oqartussammi Katsorsavik Nuuk-imik isumaqatigiissuteqarnerisigut imerajuttunik katsorsaasarneq sinerissamut siammarterniarneqarpoq, ilaatigummi sumiiffinni assigiinngitsuni qulini katsorsaasarnerit ukiumut ingerlanneqartalissapput.
- Anguniagarput pingaarpaaq tassaavoq katsorsartikkusullutik
saaffiginnittut, maannakkuminngaanniit ajornannginnerusumik
katsorsartinnissaminnut periarfissinneqarnissaat, Grethe Kramer Berthelsen, Katsorsaavik Nuuk-imik piginnittoq oqarpoq.
Maannamuugallartorli suli nalunarpoq sinerissami katsorsaanissat qulit sumi aappaagu ingerlanneqassanersut. Grethe Kramer Berthelsenimmi oqarneratut kommuunit namminneq aalajangertassavaat illoqarfinni sorlerni katsorsaasoqassanersoq:
- Isumaqatigiittassaagut illoqarfiit ilaat arfineq pingasunit amerlanerusunik katsorsagassaqarpata ornigulluta katsorsaajartortarnissatsinnut, Katsorsaavik Nuuk-imik piginnittoq oqarpoq.
Katsorsaavik Nuuk 2006-imi aallartinnerminiit, ukiuni kingullerni pingasuni katsorsaariaatsiminik allanngortitsiartorpoq. Katsorsaavik Nuuk Qaqiffik assigalugu aallartinnerminiit katsorsaariaaseq Minnesota-model atorlugu katsorsaasarsimalluni, maannakkut katsorsaasiaatsimut Cenaps-imut ikaarsaariartorpoq:
- Taava taassuma saniatigut inerisarparput, soorlu utersaartarnermi navianartorsioriaatsit, suunukua eqqarsartariaatsit, misigissutsit pissusilersuutillu atuuttartut utersaalernermi. Taakkualu ilisimalluarnerulerneranni aamma imminut pinngitsoortinnaveersaartussatut katsorsartittoq sakkussaminik annerusumik pissarsiorsinnaassaaq, Grethe Kramer Berthelsen nassuiaavoq.
Nammisorlutik Oqartussat ukioq manna Frederiksberg Centerimik, tassa Nuummi aamma Ilulissani Qaqiffinnik piginnittunut, isumaqatigiissutertik atorunnaarsippaat. Taarsiullugu imerajuttunut katsorsaasarnermut ingerlanneqarnissaa tamanut ammasumik suliariumannittussarsiuullugu.
Katsorsaavik Nuuk-ip sumiiffinni assigiinngitsuni qulini katsorsaasarnissami saniatigut Nuummi aamma Ilulissani ataavartumik katsorsaanerit ingerlattassavai.
Namminersorlutik Oqartussat Katsorsaavik Nuuk-imik isumaqatigiissuteqarnerat 2012-mi januaarip aallaqqaataaniit 2014-mi martsip naaneranut atuutissaaq.
Frederiksberg Centerip Nuummi Ilulissanilu Qaqiffinni katsorsaaneri martsip naaneranut ingerlanneqarput.