Qapuk ernisussiortuuvoq
Nunatsinni kulturi aallunneqarpoq. Kulturi pillugu tv-kkut allakaatitassiat arfineq pingasuusut Qapummik taaneqartut kingullersaat ippassaq toqqaannartumik aallakaatinneqarpoq – aallakaatitassianilu aaqqissuisut ilaata, Markus E. Olsenip, piginnaanilippassuit aallakaatitassiani saqqummertut nuannaarutigeqai.
- Aatsaat taamak uppernartigisumik erseqqitsigisumillu nunatsinni pisoqarpoq. Sinerissami perusuttut sulisinnaasullu, soorlu isiginnaagassiaaqqanik, filmilianik allanillu nuannaarnermik siammaarusuttunik inuillu qamuuna pissarsissutigisinnaasaannik sinerissami tuniserusuttoqartoq paasivarput.
- Periarfissat killeqaraluartut filmeeralianik nassiussarsiarpassuatta ersersippaat, qanorluunniit ikkaluarpat periarfissalu killeqaraluartut inuit isumassarsiorsinnaanerisa qanorlu iliorsinnaanerisa ersersippaat, periarfissanik nutaanik pilersitsisoqarpat, nunatsinni Hollywoodimilluunniit pitsaanerusunik takutitsisoqarsinnaagaluartoq.
- Periarfissat Qaputtut ittut tusagassiorfinni tv-qarfinnilu atorneqarnerusinnaagaluarput.
- Inunnit tusartakkavut malillugit aatsaat aallartittutut isigivaatigut. Naak aallakaatitassiavut ippassaq naagaluartut inuit oqarfigisarpaatigut: aatsaat aallartippusi. Taamaattumik taamatut aallakaatitassiortalernissamut Qapuk ernisussiortutut isigineqarsinnaavoq, Qapummi suleqataasoq Makkorsi E. Olsen taama oqarpoq.
Kulturimut naalakkersuisup Tommy Marøp ippassaq toqqaannartumik aallakaatitsinermi isiginnaartitsisarneq pillugu inatsiseqalernissaa neriorsuutigaa.