Nunat tamalaat aallartitaasa Libanonimi pisut pillugit Romimi ippassaq ataatsimeeqatigiinnerat annerusumik angusaqarfiunngilaq. Libanonimi eqqissisoqarnissaa isumaqatigiissutigineqarpoq, qanorli iliorluni qaqugulu tamanna anguneqassasoq eqqartorneqanngilaq.
Israelimiut ataatsimiinneq pillugu isummernerat DR-ip Jerusalem-imut aallartitaata Ole Sippelip ima oqaluttuaraa:
- Aaqqiissuteqartoqannginnera israelimiut nuannatigigaat oqartoqarsinnaavoq. Aaqqiissutissanik nassaartoqannginnerata kingunerisaanik israelimiut qaartartumeerinertik qiimmattaatigaat. Israelimiut sakkutuui amerikamiunik tapersersorneqarlutik hizbollah-kkut piuneerutsinniarlugit aaqqiisoqarnissaata tungaanut qaartartumeerisarneri sapaatip-akunnerini arlalinni ingerlaannarsinnaalerput. Israelimiut ministeriunerata Ehud Olmertip tusagassiortunik katersortitsinermini nunarsuarmioqatigiit toqqissisarniarlugillusooq oqarpoq qaammatini arlalippassuarni qaartartumeerisaqattaarunnanngilagut, Ole Sippel oqaluttuarpoq.
Taanna DR-imit aperineqarpoq ippassaq akersuunnerit sakkortunerpaammata sakkutuut qulingiluat toqutaapput, tamanna israelimiunit qanoq tiguneqarpa?
- Juutit sumiluunniit toqutaagaangata upperisaqatigiit aliasorujussuartarput. Isumasiuinerillu malillugit israelimiut Libanonip tungaanut qaartartumeerisaqattaarneri innuttaasunit tapersersorneqarluarput. Israelimi innuttaasut amerliartuinnartut sakkutuutik, naalakkersuisutik kiisalu isertortumik paasiniaasartoqatigiit ingasattajaarlutik paasissutissiisimanersut apeqqusertalerpaat, Ole Sippel naggasiivoq.