Qanganisarsiortut Saudiarabiami ilungersorput
Taakkua ministerimut allakkaminni Saudiarabiami tusagassiuutitigut kanngunartuliornerit ingasagalugit qanoq iliuuseqarfigeqquaat.
Upperisarsiornerup iluani nuimasut, qanganisarsiortut, muslimit qanga inatsisitoqaat, Sharia, naapertorlugu inuiaqatigiinnik ingerlatseqqusisut, ilaat professorit, tusagassiuutitigut arnat saqqumilaariartuinnarnerat kanngunartutut isigaat. Arnammi angutillu immikkoorluinnartussaasaraluartut tv-kkut arnat angutinik apersuisarnerat, arnallu kiinnatik assernagit saqqummilaariartuinnarnerat taakkua angutit 35-usut sakkortuumik isornartorsiorpaat. Arnat tv-kkut aviisitigullu takutinneqartarnerat pissusissamisuunngitsoq unitsinneqartariaqartorlu angutit taakkua ministerimut allaaseraat. Kunngip Abdullahp naalakkersuisuutitamini qanganisarsiornerpaat taarsersuleruttorai allakkat nassiuneqarput. Allaammi kunngip arnaq ministerit arlaannut sinniisussanngortippaa. Saudi Arabiamili qanganisarsiuut pissaaneqaqaat. Ungasinngitsukkut soorlu arnaq 75-inik ukiulik angutinik marlunnik pulaartoqarsimanini pissutigalugu eqqartuunneqarami 40-riarluni iperartugassanngortinneqarpoq. Angutit taakkua 35-t allapput arnat angutinik ilaqutarinngisaminnik ilaqaqqusaanngitsut, TV-kkut aviisitigulluunniit aamma takutinneqartussaanngitsut. Taakkua neriuutiginerarpaat ministerip tusagassiuutitigut maleruagassat sukaterumaarai, kanngunartuliat tamakkua unitsinneqarniassamata.
