Qanga uumasorsuup Tyrannosaurusip nukaa Alaskami nassaarineqarpoq
Saarngit taakku ujarannguussimasut Alaskami North Scapemi, Prince Creekimi, tassa qaasuitsup killeqarfia qaangerujussuarlugu, 2006-imili assaasoqarmat nassaarineqarput. Prince Creek sunik ujarannguussimasunik nassaarfiujuartarpoq. Saarngilli Tyrannosaurusineersut nalissaqanngitsuusut, assissaqanngitsuusullu, ukiup ataatsip matuma siorna aatsaat maluginiarneqalerpoq.
Tamanna soqutiginarluinnarpoq, paasineqarmammi Tyrannosaurus Rexit, Issittumut naleqqussarsimallutik tamaani uumasuusimasut, taamanikkut kiannerujussuunera aamma eqqarsaatigigaluaraanniluunniit. Immikkut aamma soqutiginaatigaa saarngit ujarannguussimasut maanna siumorneqartut takutimmassuk, Tyrannosaurus Rexit uumasuusimasut una minnersarimmassuk.
Mikinersatut taagorneqaraluarluni aamma taama mikitigisimanngilaq; tassamigooq meterinik arfineq-marlunnik takissuseqarpoq, mannali tikillugu minnersaasimasumit, T Reximit, meterinik aqqaneq-marlunnik takitigisumit, tassa minnerungaatsiarluni.
USA-mi naalagaaffimmi Dallasimi katersugaasivissuarmi, Perot Museum of Nature and Sciencemi, sulisut, atuagassiami Plos Onemi, saarngit ujarannguussimasut taakku allaaseraat.
Tyrannosaurusip saarngi ujarannguussimasut Alaskami Inuppiaat najugaqarfiisa eqqaani nassaarineqarmata Nanuqsaurusimik atserneqarpoq, nanoq Inuppiaat taama taasarmassuk.
Tyrannosaurusit ukiut 70 millionit missaasa matuma siorna uumasuusimasut, ilisimatuut ilimagaat. Mikisunnguunini kaperlammi seqernullu kaaviinnarnerani piniartarnissaminut naleqqussarsimassagunarpaa. Alaskamili taamani kiannerujussuuvoq, orpiit anginerullutik naasoqarnerullunilu, tamakkulu tamarmik issittumut naleqqussarnikuupput, tamaanimi sila allanngujaqimmat.
