Qamutit motoorillit umimmaat ingalassimatippaat
Tamannalu peqqutaavoq, qamutinik motoorilinnik piniartoqartarnerata kingunerisaanik umimmaat Kangerlussuup eqqaaniittut maanna ungavaraluttuinnalertut, piniarnermut nakkutilliisoq Sisimiormiuusoq, Hans Mølgaard oqarpoq.
- Ukiuni kingullerni motoorersorluni piniarneq toqqaannartumik piniutiginissaai inerteqqutaasutut allaqqavoq, kisianni piniarnermut atatillugu assartuutitut atorneqarsinnaatitaapput. Taamaattumik piniarfinnukarlutik assartuutitut atortarpaat. Taamaalillutik umimmappassuit ungavaraluttuinnalernikuupput, Hans Mølgaard oqarpoq.
Taannalu oqarpoq Kangerlussuarmi taamani umimmappassuaqarpoq, allaat illoqarfimmi akornutaalertarsimallutik.
Umimmannik kingullermik ukiut pingasut qaangiuttut kisitsisoqarpoq.
Umimmaat tikinneqajuittumi
Umimmaat tikinneqajuittumut ukiunili kingullerni pisimasut, qangalu piniarfiusartoq umimmaarussimasoq, piniarnermut nakkutilliisoq oqaluttuarpoq.
Qamutit motoorillit sisamanik assakaasullit nipaasa umimmaat piniarfitoqqamiit qimaatittaraat, taamaalillutik qimmussimik anguneqarsinnaanngitsumut qimaasartut, Hans Mølgaard nassuiaavoq.
- Soorunami aamma uumasunnguakkuluugamik inorsillugit ungavartorujussuunikuupput, ungasissumut inunnik tikinneqajuittumut. Umimmalerujussuugaluarpoq, qanittorli qangatut piniarfiusartoq umimmaarunnikuuvoq, piniarnermut nakkutilliisoq, Hans Mølgaard Sisimiuneersoq oqarpoq.
