Qamutit immamut nakkarnerat takunnittup oqaluttuaraa

Sapaatip akunnerata naanerani Qasigiannguani qimussimik unammisoqarpoq Kangaatsiarmiut peqataaffigisaannik. Kangaatsiarmiut qimussit tallimat Qasigiannguanut unammiartorput. Unammineq ingerlanneqareermat Kangaatsiarmiut qimussit tallimat angalaqataasullu angallammik Ikamiut tungaanut ingerlanneqarput. Angallatip siku artulermagu, qimussit sikumut niuneqarput. Qimussit tallimat Tussaap eqqaanit aallarput marlunngornermi ualikkut marluk missaanni. Naja Siegstad qimussit ingerlaqatigiit pingajuattut ingerlaartillutik siulii unipput, isumaqarlutik qimmit qilerutaannik ilaajaaniartut. Paasilerpaali qamutit immamut nakkarsimasut, qimmillu kisimik takuneqarsinnaallutik. Aappariit qamutinik immamut nakkartut annaanniarneqarput, siullermik uia tuumik atortoqarluni qaqinneqarluni. Nuliaasorlu noqarsimavoq ilisimananilu. Uisoq qaqinneqareernermi angallammukaanneqarpoq. Nulia qaqinneqareermat uummarsarneqarpoq, iluatsinngitsumik. Ajunaarnerup kinguninngua qulimiguullit marluk ajunaarfiusumut anngupput, aappaatalu qulimiguullip anginerusup arnaq ajunaartoq Aasiannukaallugu. Ajunaarnermi qimmit marluk aamma annaaneqarput. Qimussit ajunaarnermi atorneqartut qimmillu sinneruttut Ikamiunukaanneqarput.