Qamuteralannut akitsuut sammineqassaaq

Siunnersuutip ataatsimiititaliami suliarineqarnerani Naalakkersuisut allatut isumminngippata qamuteralannut akitsuut appartinneqarnavianngilaq.

Akitsuutip 22.000 koruuniusup appartinneqarnissaa Atassutip, Naalakkersuisoqatigiinni ilaasup, inatsisartuni ilungersorluni ippassaq anguniaraluarpaa. Ilaatigut innersuussutigaat, tulluanngitsoq inuussutissarsiortut nutaamik qamuteralassinissamut akissaqanngimmata, qamuteralaallu nutaanngitsut avatangiisinut pitsaanngitsumik sunniuteqartut atortariaqartarlugit.

Nassuiaalli tamanna partinit naalakkersuisooqataasunit akuerineqanngitsoorpoq. Partit taakku innersuussutigaat, inuussutissarsiortut qamuteralassinerminni akia tamaat, akitsuutitaa ilanngullugu, akileraarutitigut ilanngaatigisinnaammassuk.

Akitsuutip appartinneqarnissaa Demokraatit isumaqataaffigaat, meeqqanullu qamuteralaat akitsuutaasa peerneqarnissaat tamatuma saniatigut siunnersuutigaat. Tassami Demokraatit isumaqarput, taakku pinngussatut isigisariaqartut.

Siunnersuutit taakku marluk ataatsimiititaliami suliarineqartussanngorput. Tamatumunnga atatillugu ilisimatitsissutigineqassaaq; angallannermi inatsit naapertorlugu, 16-inik ukioqalersimanngitsut illoqarfiup killeqarfiata iluani qamuteralannik ingerlatsinissaat inerteqqutaammat.