Nunatsinni eqqumiitsulioriaaseq Danmarkimi soqutigineqarnersoq sapaatip akunnera qaangiuppat paasinarsissaaq.
Eqqumiitsulianik saqqummersitsinermik aaqqissuisartut tamanna neriuutigaat, eqqumiitsuliaq nutaaq, taaguuserneqarsimasoq ”Qamuteralak Aappaluttoq”, Københavnimi saqqummersinneqassammat.
Saqqummersitsineq pissaaq Nunat Avannarliit Aallartitaqarfianni, Den Nordatlantiske Brygge-mi eqqumiitsuliortut 13-it, nunatsinnut attuumassutillit, eqqumiitsuliaminnik videolianik, assilisanik, qiperukkanik allanillu tassani saqqummersitseqattaassapput.
Eqqumiitsuliortut ilassussat ilaatigut tassaapput Miki Jacobsen, Julie Edel Hardenberg, Inuk Silis Høegh aamma Anne-Birthe Hove.
”Qamuteralak Aappaluttoq” piffissami sivisunerusumi Danmarkimi saqqummersinneqassaaq.
”Qajaq Timmisoq” Odensemi 1993-imi kingullermik saqqummersinneqarpoq.