Qamussuit umimmanniarnermut atorneqartartut Kangerlussuarmi sikukkoortillutik ippassaq nakkarput, kivillutillu.
Ajutoornermi ajoqusertoqanngilaq, Arctic Green Foodilli Kangerlussuarmi suliffeqarfia matusariaqassasoq, suliffeqarfissuup pisortaa Hans Jensen oqarpoq.
Taamaakkaluartoq ajutoornerup Kangerlussuarmi Arctic Green Food-imut sunniuteqangaarnissaa Hans Jensenip ilimaginngilaa, piniartulli eqqorneqassapput.
Qamussuarnik piginnittoq aqutsisorlu Jørgen Mortensen oqaluttuarpoq arfiniliullutik angerlamut ingerlaaruttortillutik ajutoorneq pisimasoq:
- Umimmaat pisarisimasagut 27-t usigalugit taseq ikaaleruttorlutigu sikukkut nakkarpugut, qujanartumillu qamussuit ingerlaannaq kivinngillat, taamaasillutalu annassinnaasimalluta, Jørgen Mortensen oqarpoq, nangillunilu:
- Qaammataasatigut attaveqartumik oqarasuaateqarallartillunga ikiortissarsisinnaasimavunga, Jørgen Mortensen oqarpoq.
Piniartut Sisimiuneersut aqqaneq-marluk umimmanniarnissartik taamaatiinnartariaqarsimavaat, tamarmillu immikkut 30.000 koruunit missaanni annaasaqassangatinneqarput, KNAPK-milu siulittaasup Peter Olsenip oqaasii naapertussagaanni annaasaqaatit 400.000 koruunit missaanniissapput.
Kangerlussuarmi pisimasut tunngavigalugit piniartut maanna nalunaarusiortinneqassapput, annaasaqataasimasut uppernarsaatissallu allat nalunaarusiornermi qulaajarneqassapput KNAPK-mullu nassiunneqassallutik.
Piniartut sinnerlugit KNAPK aalisarnermut piniarnermullu pisortaqarfimmut saaffiginnissuteqassaaq, piniartut arlaatigut ikiorneqarsinnaanissaat anguniarneqassalluni.