Qallunaat politikerii nunasiaanerup nalaanisut pissusilersorput
-Tupinnaqaaq qanganisarpalussusiat, taama aamma oqarpoq Lars-Emil Johansen, S, folketingimi ilaasortaq nangipporlu.
Isumaqarpunga qaammaasaqarnerusutut iliuuseqartariaqartut, soorlu oqaloqatigerusukkunitigut oqaloqatiseraluta. Isumaqatigiinninniaqatigerusukkunitigut isumaqatiginiaqatiseraluta sioorasaariinnaqinatik.
Sooq qimaasut pillugit taaseqataaniarnersoq Lars-Emil Johansen aperineqarami oqarpoq, meeqqat qimaasut inaanni atugarliuutaasa pitsanngorsarneqarnissaat pingaartikkanigit taaseqataajumanerarpoq.
- Taanna sioqqullugu tamanna oqaaseqarfigisarsimavara oqalliseqataasarsimallungalu qinersinissaq sioqqullugu,Atlantikup avannaani suleqatigiiffik sinnerlugu, Høgni Højdahl uangalu suleqataaffigereersimavarput. Nunasiniartut atugarisaat pillugu, apeqqut taanna aamma nunatsinni Naalakkersuinikkut oqartussaaffigineqaleriaannaammat, Namminersorneq pillugu isumaqatigiinniarnerit naammassinerata kingunerisaanik.
Apeqqutigaarput pissusissamisoornersoq Danmarkimi nunap iluanut pissutsinut kalaallit politikkikkut akuliutissapata, uffa illuatungaatigut danskit politikkerii Kalaallit Nunaata iluani pissutinut akiuteqqunagit erseqqissarneqartuartartoq, Lars-Emil Johansen akivoq:
- Taanna marluinnarnik aqqutissaqarpoq, isumaqatigiittoqarsinnaappat qallunaat politikkerii Kalaallit Nunaannut tunngasunik akulerutinngisaannassasut imaluunniit kalaallit folketingimi ilaasortaqarunnaassasut. Aatsaat taakkua aqqutigalugit taamatut pisoqarsinnaavoq. Folketingimi kalaallinik ilaasortaqartillugu qanoq aaliangernissarput, qanoq isummernissarput taanna killilersorneqarsinnaanngilluinnarpoq, taama oqarpoq Lars-Emil Johansen, S, Kalallit Nunaat sinnerlugu folketingimi ilaasortaq Kangerlussuarmiit Danmarkiliarluni aallaliivissoq.
